Tinan-tinan, Governu Austrália Apoiu Fundu Tokon $80 Bá Governu T

Smnewstl.com — Governu Austrália tinan-tinan fó apoiu orsamentu ho montante tokon $ 80 bá governu Timor-Leste hodi finansia prosesu dezenvolvimentu iha área oi-oin.

Embaixadór Austrália iha Timor-Leste, Petter Robert informa, nia sente kontente tebes bele hasoru malu ho Vise Primeiru-Ministru (PM) ho membru sira ámbitu reuniaun Timor-Leste Development Partner’s Meeting (TLDPM) hamutuk ho Timor-Leste nia parseiru sira liu husi programa dezenvolvimentu.

Petter Robert manifesta governu Austrália nia prontidaun, tanba governu Austrália iha komitmentu atu servisu hamutuk ho governu Timor-Leste, nune’e bele lori dezenvolvimentu bá povu.

“Entaun ha’u bele konfirma liután katak, Austrália kontinua servisu nafatin, tinan ida-ne’e Austrália nia orsamentu dezenvolvimentu bá Timor-Leste mais ou menus milliaun $ 80 amerikanu, tanba corona vírus tanba inundasaun, Austrália aumenta orsamentu ne’e mais ou menus milliaun $ 30 liután,” dehan Embaixadór Austrália, Petter Robert, Tersa (27/07/21) hafoin remata enkontru TLDPM iha MNEK Pantai-kelapa, Dili.

Nia hatutan, tinan-tinan governu Austrália hamutuk montante tokon $ 80, maibé tinan ida-ne’e, aumenta tan montante tokon $ 30 hodi responde bá pandemia Covid-19 no inundasaun.

Nia observa katak, orsamentu sira-ne’e, governu Timor-Leste ezekuta duni bá halo prevensaun Covid-19 no mós responde bá inundasaun ne’ebé akontese iha loron 4 fulan-abríl tinan 2021 liu bá.

“Tinan-tinan orsamentu mais ou menus milliaun $ 80 no tinan ida-ne’e espesialmente tanba corona vírus no inundasaun aumenta milliaun $ 30 ne’e la’o di’ak, bele responde bá inundasaun no mós responde bá corona vírus inklui mós suporta bá laboratóriu nasionál testementu bá fatin izolamentu advokasia kona-ba corona vírus no importante duni vasina,” hateten Petter Robert.

Tanba ne’e Diplomata Australianu reafirma, governu Austrália nafatin servisu ho Timor-Leste liu-liu alíña ho sistema governu Timor-Leste nian, nune’e bele responde bá prevensaun Covid-19 no inundasaun.

Maibé mós kontinua servisu nafatin iha área ne’ebé governu fó prioridade, hanesan edukasaun, solidariedade sosiál, diversifikasaun ekonomia no mós iha área infraestrutura no agrikultura.(ant)