Timor Resource Lakoi Ansi fo Sai Rezultado Perfurasaun Mina Iha Suai

Smnewstl.com 09-11-2021 (Dili) – Manager Country Timor Resource, Filomeno Andrade agradese apoio husi entidadades hotu nian li-liu autoridade nomos komunidades Suai rasik ba servisu perfurasaun Mina ne’ebe dadaun ne’e lao hela iha Feto Kmaus.

Filomeno rekuinese, projeitu ne’e projeitu nasaun nian nune’e ema hotu tilun nakloke hodi akompanha ninia progresu.

“Servisu lao hela desde ke lansamentu iha loron 27 Outubro 2021, husi Primeiro Ministro, Taur Matan Ruak. Ami nia targetu perfurasaun ba nia klean ne’e 1040, maibe agora foin mak klaran hela, ne’ebe kona ba rezultado hau hanoin seidauk bele. Ami labele fo sai buat ne’ebe mak seidauk hetan,”informa Filomeno ba SMNewstl via telefone.

Enkuanto sai viral iha pagina privado facebook ho identidade Băňğpol corona horseik haktuir, agradesimentu wain ba aman maromak, respeita rai nain lulik no martires herois da patria no natureza Timor katak, hahu hatudo rezultado positivu ba servisu perfurasaun hodi lori sentimentu kontenti ba timoroan sira.

Filomeno komfirma, informasaun ne’e la los no konsidera individu ne’ebe lansa infirmasaun ne’e bosok.

Nia hatutan, targetu ba perfurasaun loron rua nulu nune’e desde ke lansamentu iha loron 27 Outubro 2021, sira sei iha biban para atu halao servisu.

Antes hakotu, Filomeno husu ba parte hotu atu pasensia tamba projeitu ne’e, projeitu bo’ot ne’ebe ema hotu loke tilun hodi akompanha. Tamba ne’e karik iha informasaun diak ruma sei fo sai.

Servisu perfurasaun ne’e rasik, Timor Resource parseria ho Kompãnia Mina Estatal Timor Leste Timor GAP no hetan fiskalizasaun hosi Autoridade Nasionál Petróleu no Minerais -ANPM. (Rio)