Smnewstl.com 13 Outubru 2024 (PORTUGAL — Primeiru-Ministru (PM), Kay Rala Xanana Gusmão hala’o enkontru ho komunidade timoroan ne’ebé estuda no hela iha Portugal hodi enkoraza sira atu kaer metin prinsípiu nu’udár timoroan nian.
Xefe Governu husu timoroan sira atu kontinua promove Timor iha mundu, tanba nu’udár timoroan iha responsabilidade atu servi nasaun no povu ho kualkér servisu ne’ebé sidadaun ida halo.
“Durante luta libertasaun timoroan kuaze 250.000 mak mate. Tanba ne’e, hakarak husu imi sira hela iha Portugal, ho kapasidade imi-nian atu kontribui bá nasaun, imi ne’ebé daudaun estuda iha Portugal favor fila-fali bá ita-nia rain hodi ita hamutuk dezenvolve ita-nia nasaun,” PM Xanana hateten, iha sede UCCLA, Portugal, domingu (13/10/2024).
Biban ne’e, timoroan sira rekomenda mós bá IX Governu Konstitusionál tau prioridade bá área importante sira liu-liu saúde no edukasaun, tanba área rua ne’e mak liga direta ho povu nia moris.
Enkontru ne’e Primeiru-Ministru akompañadu hosi Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Jjustisa, Sérgio de Jesus Fernandes da Costa Hornai, Ministra Edukasaun, Dulce de Jesus Soares, Ministru Ensinu Superiór Siénsia no Kultura, José Honório da Costa Pereira Jerónimo; Ministru Interiór, Francisco da Costa Guterres, Sekretáriu Estadu Komunikasaun Sosiál, Expedito Dias Ximenes, Prezidente Câmara Comércio no Indústria Timor-Leste (CCI-TL), Jorge Serrano, Embaixadora Timor-Leste iha Portugal, Isabel Guterres, Sekretáriu Jerál Uniaun Sidade Kapital Lian Portugés (UCCLA, sigla portugés), Vitor Manuel Sampaio Caetano Ramalho no Xefe Gabinete PM, Elizabeth Exposto. (*/Smnews)
Komentariu