Timor-Leste Selebra Akordu Kona-ba Viza Lívre ho Singapura ba Periodu Loron 30

Smnewstl.com – Ministru Negósius Estranjeirus no Kooperasaun (MNEK), Bendito dos Santos Freitas, reprezenta Governu Timor-Leste kinta liu-ba, ofisialmente selebra tan akordu ida ho Governu Singapura kona-ba aplikasan vistu lívre durante loron 30 ba passaporte servisu, komúm no diplomátiku.

Akordu ne’e asina husi ho omólogu Ministru Negósius Estranjeiru Singapura, Vivian Balakrishnan, hafoin remata enkontru bilateral.

Ministru Bendito Freitas konsidera, akordu sobre ijensaun vistu ne’e importante tebes, tanba bele fasilita di’ak liután movimentasaun husi sidadaun Timor-Leste ho Singapura no seluk tan.

“Iha Singapura, asina mós akordu kona-ba ijensaun de vistu ba passaportes diplomátiku, passaportes servisu no passaportes komúm, ligasaun Timor-Leste ho Sinapura, ida-ne’e importante atu tulun ita-nia komunikasaun, ita-nia ligasaun vizita ka mobilidade ita-nia sidadaun Timor-Leste bele mai iha Timor-Leste, singapura mós bele ba Timor-Leste, haree ba parte investimentu nian,” informa Ministru Bendito.

Governante ne’e akresenta, Governu Singapura manifesta tebes sira-nia prontidaun atu tulun Governu Timor-Leste iha aspetu kapasitasaun rekursu umanus no seluk tan.

“Singapura loke odamatan ita prepara aan didi’ak, ita-nia kuádru sira ita dezeña planu ba kapasitasaun rekursu umanus, bele komunika mai Singapura, tanba Singapura prontu atu simu sira atu bele tuir formasaun iha áreas espesífikas ne’ebé presiza tuir ita-nia nesessidade ita-nia estadu nian,” tenik nia.

Iha enkontru ne’e, Ministru Bendito ho nia omólogu ko’alia mós kona-ba konektvidade transporte aero entre Timor-Leste ho Sinagpura, no possibilidade ba futuru sei aumenta tan frekuénsia voo entre Dili no Singapura, tanba oras ne’e dadauk, aviaun Aero Dili maka halo hela operasaun semana ida dala.

Alende ne’e, Ministru Vivian Balakrishnan dezafia Governu Timor-Leste atu tau prioridade ba kapasitasaun rekursu umanus nu’udar polítika estadu, tanba ne’e nesessidade fundamental nasaun no liu-liu partisipasaun Timoroan sira-nian iha prosesu dezenvolvimentu nasionál.

“Nune’e mós Ministru reforsa katak, momentu ida-ne’e oportunu teb-tebes ba Timor-Leste nia dezenvolvimentu, tanba iha líder ne’ebé di’ak hanesan Prezidente Repúblika no mós Primeiru-Ministru, iha kolaborasaun ne’ebé di’ak, atu bele dezenvolve iha espasu ne’ebé iha hodi aprofunda, konsolida dezenvolvimentu nasional Timor-Leste nian,” katak Governnate ne’e.

Ministru Bendito mós agradese ba Governu Singapura nia apoiu ba Timor-Leste desde inísius iha restaurasaun independénsia to’o ohin loron, no mós kooperasaun ne’ebé sei kontinua to’o ohin loron iha área ekonomia, kapasitasaun rekursu umanus liu husi programa stars no seluk tan.

Entretantu, enkontru bilateral ne’e entre Xefe Diplomasia Timor-Leste ho Sinapura ne’e, hala’o iha Ministériu Negósius Estranjeirus Singapura nian, no akompañadu husi Embaixadór Timor-Leste ba Singapura, Alex Tilman, Xefe Gabinete MNEK, Filomeno Rómulo Lay no seluk tan. (*/Smnews)