Timor-Leste Sei Organiza Festival Nasionál no Internasionál

Smnewstl.com – Prezidente Repúblika, José Ramos-Horta ho governu sei realiza festival nasionál no internasional iha tempu badak hodi promove liu-tan kultura no turizmu Timor-Leste nian ba komunidade internasional.

Molok atu realiza festival ne’e, Prezidente Horta hamutuk ho Vise Primeiru-Ministru nain rua ho membru governu relevante sira hala’o ona enkontru preparasaun iha Palásiu Prezidensial.

Hafoin remata enkontru ne’e, Vise-Primeiru Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay ne’ebé reprezenta governu iha enkontru ne’e katak, Timor – Leste sei organiza festival internasionál ne’ebé sei foka ba promosaun arte, kultura, turizmu, siensia no teknolojia inklui desportu.

“Hanesan ita boot sira hatene katak, ohin dadersan hahu husi oras tuku 11:00 dader, Prezidente Repúblika Timor-Leste, José Ramos-Horta konvoka reuniaun ida hamutuk ho ministériu integradu liu-liu husi membru governu kompostu husi Vise-Primeiru Ministru nain-rua ho membru governu lubuk ida mai rona orientasaun hodi halo serbisu ba festival nasionál no internasionál ne’ebé foka liu-ba iha arte kultura, turizmu, siensia no teknolojia inklui desportu,” Vise-Primeiru Ministru, Ministru Koordenador ba Assuntu Ekonómiku, Ministru Turizmu no Ambiente, Sua Exselensia Francisco Kalbuadi Lay esplika ba jornalista sira hafoin remata enkontru ne’e iha Palásiu Prezidensial iha loron Kinta, 22 fevereiru 2024.

Reprezentante governu ne’e hatutan, fatin ba organiza eventu festival ne’e depende ba ministériu ida-idak nia atividade, no sei hahu iha fulan Agustu nia laran no orsamentu rasik sei mai husi Palasiu Prezidensiál, no la taka dalan ba ministériu ida-idak ho nia orsamentu rasik atu kompila ka tau hamutuk hodi kompleta malu.

“Orsamentu ba eventu nasionál no internasionál ne’e sei mai husi Palásiu Prezidensiál no ministériu relevante sira, atu kompila hamutuk hodi fó susesu ba atividade sira ne’e.”

Vise Primeiru Ministru ne’e informa, objetivu prinsipal husi festival internasionál ne’e mak atu halo promosaun ba kultura no turizmu Timor-Leste nian inklui hasa’e koñesimentu sosiadade nian iha siensia no teknolojia. (SMnews)