Tenta Halai Ses Husi Prosesu Investigasaun, Polísia Kaptura Libório Perreira Iha Aeroportu Comoro

Smnewstl.com 06-11-2021 (Dili) – Polísia Nasionál Timor-Leste (PNTL), liu husi Servisu Investigasaun Kriminál Munisípiu Dili, kaptura eis Prezidente Komisaun Funsaun Públika (KFP), Libório Perreira iha tuku 13:00 iha Aeroportu Internasionál prezidente Nicolau Lobato, tanba tenta atu halai ses husi prosesu investigasaun bá krime ne’ebé diskonfia involve mós nia.

Tuir informasaun ne’ebé Smnewstl asesu katak, eis Prezidente KFP ne’e to’o iha Aeroportu Comoro, bainhira atu halo checking, maka Polísia Servisu Migrasaun la autoriza hodi tau karimbu bá nia passaporte, tanba rajaun Libório Perreira iha tribunál aplika hela Termu Identidade Rezidénsia (TIR).

Antes ne’e, liu husi desizaun Primeiru interrogatóriu, tribunál distritál Dili, aplika Termu Identidade Rezidénsia (TIR) bá eis Prezidente KFP ne’e, tanba diskonfia komete iha krime partisipasaun ekonómika no negósiu, bainhira asume hela kargu hanesan Prezidente KFP.

Hafoin kaptura, polísia Servisu Investigasaun lori kedas Libório Perreira bá iha Komandu Polísia Munisípiu Dili hodi halo identifikasaun.

Antes ne’e, PNTL liu husi Servisu Investigasaun Kriminál Munisípiu Dili ezekuta mandadu detensaun tribunál distritál Dili, kaptura eis Prezidente KFP iha nia servisu fatin Ministériu Negósiu Estranjeiru no Kooperasaun (MNEK).

Servisu Investigasaun Kriminál Munisípiu Dili kaptura suspeitu, tanba diskonfia suspeitu involve iha krime partisipasaun ekonómika no negósiu ne’ebé previstu iha artigu 299 kódiku penal, bainhira asume hela funsaun nu’udar Prezidente KFP iha tinan 2017, no ameasa prizaun tinan 2 to’o tinan 8.

Entretantu, bainhira termina mandatu nu’udar Prezidente KFP, Libório Perreira kontinua servisu iha MNEK hanesan Diretór Ajente Kooperasaun Timor-Leste komesa iha tinan 2017.(ant)