Tan Patria, Hewai Sakrifika O Alin

Rai ne’e ohin livre ona ! karik, refleta oinsa mak nia livre? Tan patriota sira ne’ebe mak nia ran sosa kotu liberdade ne’e, sira isin no ruin nakfilak ona sai estrume ho habokur rai ne’e no sira ran mak halulik ona rai doben ida ne’e, atu oan no bei-oan sira sente folin husi liberdade ne’e.

Patriota di’ak ida ne’ebé rai ne’e hahoris mak, Komandante Mautxay, serbi’i ho lealdade, kumpre orden komando ho totalidade, to’o inimigu hakotu vida iha lina kombate.

Tan patria ida ne’e, la kohi ema seluk sama resik, Timor nia emar sira, patriota tuba metin hodi reziste to’o ran turuk ikus nian katak, dever kumprida hanesan emar ida, husi rai ne’ebe sira husar talin hakoi ba!

Tan patria mos, balun ho klosan la iha biban atu forma familia, tan kumpre palabra de orden katak, hau rai nia liberdade, folin liu ha’u nia hakarak. Serbi’i ho totalidade ne’e mak Saudozu Mautxay .

Loron ida antes nia mate iha Batalla, Komandante Brigada Vermelha Falutxay maun husi Mautxay organiza formatura hodi fo ordem ba Komandante Pilotaun Renan Selac (Render Nunca, a não ser levar a cabeça), atu ba reforsa Komandante L7 iha Sub região Luar( dentru Laivai no Laga )ne’ebe iha liña kombate.

De repente rona novidade katak, Renan Selac moras no labele ba, la kohi atu nia maluk luta mesak iha lina de fogu, Komandante Falutxay organiza urjentemente formatura, hodi fo sai orden foun, atu ema komandante ida bele desloka ba fatin ne’ebe mak determina.

Ho arrependimentu ba auzénsia Komandante Renan tamba Moras , iha formatura nia laran, Komandante Falutxay hateten: Mautxay sai husi formatura! Ho konfuzaun, kumpre ordem komandu hodi sai husi formatura, no Komandante tenik tan, organiza o nia ema ba Sub Região Luar hodi troka komandante Renan.

Laran todan tebes, atu aseita orden ne’e, maibe tanba ordem, subordinadu ida labele kontesta, maske ida ne’ebe komanda, hanesan nia maun rasik, moris husi inan-aman ida, maibe iha militar, ordem ne’e ordem, atu kumpre la’os atu kontesta.

Komandante Mautxay laran susar teb-tebes no fila ba akampamentu, kasu ba nia bin Bia Shana Falu, Komandante Falutxay nia kaben ho nune’e: ita-nia sapatu la iha mos haruka ita ba operasaun ne’e! ho nune’e, Bia Sana Falu hatutuan kedas ba Komandante Falutxhay katak, : Mautxay nia Sapatu la iha bele ba operasaun ka?

Komandante Hatan nune’e: nia ba uluk, mak sapatu tuir! Ne’e mak orden, Komandante Mautxay ho nia soldadu sira ezekuta orden ne’e, hodi hakat ba lina kombate, hamutuk ho nia soldadus.

Orden ne’e, ho finalidade ida ne’e, ” terra livre no pátria livre” ba ida ne’e, ba patriota ida, interesse pessoal, soe ba kotuk, hateke ba oin, hodi luta ba kauza komum ida ne’e, tan sira mak verdadeiru defensor ba rai ida ne’e.

Hakat ba lina de fogu, ho ain tanan, sapatu la iha, ba oin nafatin Mautxay, servidor da patria, ho totalidade, tan patria, buat hotu soe ba kotuk, komprometidu luta ba terra livre no patria livre!

Liu tiha, sapatu ne’ebe nia maun promete tuir, hodi ba entrega iha komandante Mautxay, seidauk to’o nia liman, seidauk koko tan sapatu ne’e, la kleur estafeta ida ne’ebe lori sapatu, lori hikas sapatu mai, ho laran susar laran taridu, komandante Falutxay hatene kedas katak, nia alin doben la iha ona, inimigu hasai ona nia vida.

Bia Sana Falu mos rona novidade susar ne’e, nia hateten ba comandante Falutxay, o haruka kedas o nia alin ba ne’e, nia la iha ona, familia hela ho sentimentu moruk nia laran, lutu ba Mautxay nia mate.

Fulan hirak nia laran, Komandante Falutxay neon kraik los ba nia alin ne’ebe lakon iha kombate, tuur moron hela de’it, hodi hanoin nia alin ne’ebe lakon, husu sapatu atu ba operasaun mos la konsege hatais, maibe novidade moruk mak mai fali..

Komandante Falutxay tenik hikas; ha’u nia alin mate ona, ha’u mos sei mate, maibe antes mate, tanque salva ha’u nia oan sira, hodi lori ba vila, atu bele sira hatutan missaun lulik ne’e, to’o luta naruk ne’e remata.

Missaun kumprida! Komandante Falutxay mos mate iha lina combate iha Txayvacha hamutuk ho nia soldadu nain 9, fatin ne’ebe ohin loron hari’i ona momumentu ida, ne’ebe ohin loron sai sasin monok, ba luta husi patriota sira.

Mautxay ba ona, nia ba ona eternidade, misaun lulik ne’e, nia sisi hela, atu hirak ne’ebe hatutan ninia misaun bali netik, hodi labele monu le’et de’it ba rai no nia sempre defende katak, lutador ne’e lutador nafatin “ aban bain rua, funu hotu ita manaan, mak tun ba vila, mak ida reklama dehan nia mak oho ema Barak, nia mak luta liu, hau mak sei foti kilat oho nia, tanba iha ne’e ita hatene malu, se mak brani se mak la brani – Mautxay”

Husi ne’e nota, Mautxay ne’e verdadeiru guerilleiru ida, nunca tauk ba inimigu, tanba ninia kumpre nia dever nu’udar patriota, hodi luta ba kuaza komum – terra livre no patria livre.

Ba sira nia totalidade, hodi serbi’i rai ida ne’e, mak sisi ema hotu, atu banati tuir, ba interesse rai ida ne’e, hari’i no dezenvolve mak missaun nobre ne’ebé mak ema hotu tenke ezerse.

Sira, herois no mártir sira nia klamar sei hakmatek iha eternidade, waihira sira nia luta ne’e, la monu le’et de’it, iha ema ne’ebe kontinua bali rai ne’e, hewai buat hotu, mak sei fo gloria ba sira, mak sira nia luta, sira nia mehi, sai nafatin masin ne’ebe kontinua hameer iha rai ne’e nia leten.

Descansa Em Paz Comandante