Suspeitu ba Kazu Insestu no Baku Mate Oan Intrega Ona Mai Migrasaun TL, Entre ‘Hotel’ Becora ho ‘Livre’

Smnewstl.com 26-12-21 (Batugade) – Autoridade Seguransa Indonézia deporta fali suspeitu mane 1 ba kazu violasaun seksual hasoru nia oan CeD tinan 11 no baku mate tan vitima, iha Aldeia Moris Foun, Suku Comoro, ne’ebé hakat fronteira terrestre liu dalan ilegál no hetan kapturasaun husi Polres (Sigla Indonezia; Kepolisian Resor) Kupang Timur, entrega hikas mai Migrasaun Timor-Leste iha Batugade.

Prosesu Intrega Suspeitu kazu insestu no baku mate oan husi Autoridade Seguransa Indonesia mai Migrasaun TL iha Fronteira. Foto Servisu Relasaun Publiku MI

Tuir informasaun kumpletu ne’ebe Smenews asesu husi servisu relasaun publiku Ministerio Interior komfira, hafoin Suspeitu ne’e halai sai husi Timor-Leste ba Indonezia, Komandu Jeral PNTL liu hosi SIP (Servisu Informasaun Polisia) halo kedas koordenasaun intensivu ho Servisu Informasaun Polisia Indonesia-NTT nian no menus husi oras 72 suspeitu ne’e hetan kedas kapturasaun iha rezidensia familiar area Kupang Timur ne’ebe partense ba Polres Baubau.

Prosesu Intrega Suspeitu kazu insestu no baku mate oan husi Autoridade Seguransa Indonesia mai Migrasaun TL iha Fronteira. Foto Servisu Relasaun Publiku MI

Diretor Jeral Servisu Migrasaun, Superintendente Asistente Polisia Luis Barreto, deklara desizaun Governu Indonézia entrega timor oan ne’e bazeia ba kooperasaun diak entre autoridade Seguransa Indonezia no PNTL.

“Atu informa deit suspeitu ba kazu insestu iha Comoro ho naran inisial VftS tinan 33, husi Munisipiu Manatuto, ne’ebe halai ba Kupang-Indonezia hetan kapturasaun husi Polres Baubau  Provinsia NTT Kupang Timur iha loron 23 dezembru 2021. Bazeia ba kooperasaun diak entre autoridade Seguransa Indonezia no PNTL horseik Migrasaun Indonezia entrega hikas suspeitu mai ita iha Batugade hodi kontinua halo prosesu ba nia”, informa Luis Barretto, iha sede Servisu Migrasaun Vila-Verde, Domingu ne’e.

Luis saliente, hafoin halo identifikasaun iha Postu Integradu Fronteira Mota-Ain-Batugede, Komandante Postu Servisu Migrasaun Batugade entrega fali suspeitu ne’e ba iha Servisu Investigasaun Kriminál Nasionál (SIKN) hodi submete ba prosesu investigasaun.

Enkuantu prosesu deportasaun ne’e hetan mos partisipasaun hosi Konsul Timor-Leste iha Kupang, Gito Matos, Komandante SIP, Superintendente Polisia Boavida Ribeiro, Komandante Operasaun SIKN Inspetor Xefi Polisia Mouzinho Correira, reprezentante Servisu Nasionál Intelejensia (SNI) no-mos Komandante Postu Servisu Migrasaun Batugade.

Enkuanto suspeitu rasik submete ona ba sela detensaun oras 72 hafoin kontinua kedas ba julgamentu primeiro intergatorio iha Tribunal Distrital Dili hafoin bele hatene lori ba deskansa iha ‘Hotel’ Becora ou livre. (*/rio)