Subsídiu Transporte Bá Kargu Diresaun No Xefia, Kada Funsionáriu Hetan USD 25 to’o 150

Smnewstl.com 20-09-2021 (Dili) – Governu liu husi reuniaun konsellu ministru extra-ordináriu Segunda-feira ohin, aprova projetu dekretu-lei kona-ba kriasaun subsídiu mensál transporte bá kargu diresaun no xefia sira iha administrasaun públika.

Projetu dekretu-lei ne’e, aprezenta husi Ministru Finansas, Rui Agosto Gomes, nune’e, funsionáriu públiku no kargu xefia sira labele lori ona veíkulu estadu nian bá uma.

“Ho ida-ne’e, DG (Diretór Jerál) sira, diretór nasionál sira, xefe departamentu sira no funsionáriu públiku sira sei hetan subsídiu, sira sei laiha ona kareta ne’ebé mak sira lori bá uma, lori bá mai lor-loron,” informa Ministru Prezidénsia Konsellu Ministru, Fidélis Magalhães, segunda ohin iha Palásiu Governu.

Tuir kálkulasaun governu nian konsidera, medidas ida-ne’e, permite hodi alkansa poupansa ida liu dólar amerikanu $ 700 kona-ba kustu akizasaun no manutensaun bá veíkulu sira no mós kombustível.

“Ho subsídiu ida-ne’e, buat ne’ebé mak governu propoin ne’e mak bá funsionáriu públiku sira ho montante $ 25 dólar por mes, bá xefe sesaun sira $ 50 dólar, bá xefe departamentu sira $ 75, nasionál sira $ 100 dólar no Diretór nasionál sira $ 150,” tenik nia.

Tanba ne’e, projetu dekretu-lei governu aprova ona, ni sei haruka bá iha promulgasaun husi Prezidente Repúblika, ne’eduni, bainhira hetan ona promulgasaun bá dekretu-lei sira-ne’e, maka sei tama envigór iha fulan-janeiru 2022.(ant)