Subsídiu Transporte Bá Funsionáriu Públiku Kontribui Bá Redús Despezas Estadu

Smnewstl.com 05-10-2021 (Dili) – Diretór Jerál Jestaun Patrimóniu Estadu (DJJEP) Ministériu Finansas, Januário da Gama hateten, governu introdús polítika hodi atribui subsídiu transporte bá funsionáriu públiku no kargu xefia sira-ne’e atu bele kontribui bá redús despezas estadu.

Tanba tuir Januário da Gama katak, bazeia bá rezultadu flit survey ne’ebé sira halo, identifika viaturas estadu hamutuk rihun 3.415, maibé ne’e seidauk inklui ho ekipamentu pezadus estadu nian, no mós kareta ne’ebé sosa iha tinan 2021 ne’e.

Nune’e, husi kareta estadu rihun 3.415 unidades, bainhira halo somatóriu bá valór ekonómika osan to’o 2020 ne’e, estadu hasai ona purvolta de $ 125 milloens atu halo akizasaun, manutensaun, reparasaun no kombustível bá kareta sira-ne’e.

“Husi $ 125 milloens ne’ebé governu hetan, durante tinan 20 resin, governu hasai purvolta de $ 250 milloens par finansia bá iha ninia operasaun, bá iha manutensaun, bá iha reparasaun bá iha kombustível. Tinan-tinan ita haree gráfikamente despezas bá operasoens bá kareta estadu ne’e tinan-tinan aumenta, karik ita la introdús reforma ruma bá iha jestaun viatura estadu ne’e rasik,” Diretór Jerál, Januário da Gama, informa bá jornalista sira iha nia knaar fatin patrimóniu estadu Balide, Dili. Tersa ohin.

Konsellu ministru mós aprova ona rezolusaun governu hodi fó kompeténsia bá diresaun jerál jestaun patrimóniu estadu, atu introdús ka halo revizaun bá dekretu-lei kona-ba jestaun frota, nune’e labele labele hatodan despezas estadu iha futuru.

Tanba ne’e, nia informa, diresaun jerál jestaun patrimóniu estadu hamutuk ho diresaun jerál planeamentu no ordenamentu hodi halo rasionalizasaun bá despezas, nune’e bele redús númeru viaturas estadu, maibé haree mós bá efeitu multiplikador husi redusaun refere.

“Bainhira ita ko’alia kona-ba redusaun númeru viaturas estadu, nia fó efeitu multiplikativa bá kargu xefia sira, durante ne’e kargu xefia sira lori kareta bá uma, mai edifísiu, halo viajen, bá tuir reuniaun ho sel-seluk tan, mais kuandu ita redús númeru viaturas estadu, kargu xefia sira sei laiha tan fasilidade ida hanesan ne’e par atu fasilita sira lor-loron,” subliña nia.

“Mais ami hakarak atu haree de’it ninia rasionalizasaun ne’e katak, jestaun frota ne’e ita sei introdús par atu bele halo efisiénsia utilizasaun no nia rasionalizasaun bá despezas ne’e rasik. Sé númeru viaturas ida-ne’e mak ita la konsege redús, entaun sei kontribui tan ita-nia despezas ne’e kontinua boot tinan bá tinan,” hatutan nia.

Januário da Gama rekoñese, halo redusaun bá viaturas estadu ne’e, téknikamente sai dezafius boot bá diresaun patrimóniu estadu, tanba tenki halo rejistrasaun bá viaturas hirak ne’e, atu bele iha dadus korretu.

Tanba ho dadus ne’ebé korretu, sei fasilita liután patrimóniu estadu atu halo realokasaun viaturas estadu sira tuir rezolusaun governu n°.130 ne’ebé aprova ona iha konsellu ministru.

Entretantu, antes ne’e, konsellu ministru aprova ona dekretu-lei atribuisaun subsídiu transporte bá funsionáriu públiku kada fulan sei hetan osan dólar $ 25, no kargus xefia sira sei hetan subsídiu transporte husi dólar $ to’o dólar 150 kada fulan.

Ho atribuisaun subsídiu transporte ne’e, atu bandu funsionáriu públiku ho kargu xefia sira labele lori veíkulu estadu nian bá uma.

Dekretu-lei ne’e, submete ona bá Prezidente Repúblika atu hetan promulgasaun, tanba ne’e bainhira Xefe Estadu promulga, maka sei hahú nia implemetasaun iha janeiru tinan 2022.(ant)