SQR Realiza Semináriu Família Forte, Nasaun Forte no Transformasaun Bá Moris Di’ak

Smnewstl.com 09-10-2021 (Dili) – Sentru Quesadhip Ruak (SQR) realiza semináriu ho tema família forte nasaun forte no sub-tema transformasaun bá moris di’ak hodi hasa’e joven jerasaun foun sira-nia kuiñesimentu iha área psikolojia no disiplina pozitivu.

Prezidente Konsellu Administrasaun Sentru Quesadhip Ruak, Leonildo da Costa hateten, semináriu ne’e realiza, iha ámbitu komemorasaun ejisténsia Sentru Quesadhip Ruak nian bá dala-sia ne’ebé monu iha loron 09 fulan Outubru tinan 2021 ne’e.

“9 anoa Sentru Quesadhip Ruak hanesan semináriu atu selebra 9 anos ne’e ho tema, família forte nasaun forte, sub-tema mak transformasaun moris ne’ebé di’ak,” dehan Prezidente Konsellu Administrasaun, Leonildo Tomas da Costa, iha SQR Taibessi, sábdu ohin.

Matéria prinsipál iha semináriu ne’e mak, oinsá reforsa transformasaun bá moris ne’ebé di’ak, nune’e bele eduka joven jerasaun foun sira bele hatene kona-ba estudu personlidade no disiplina ne’ebé pozitivu.

Tanba estrutura personalidade hanesan baze importante bá dezenvolvimentu umanu no liu-liu bá indivídu sira.

“Moris ne’ebé di’ak ami hili área ne’ebé importante atu reforsa transformasaun moris ne’ebé di’ak ne’e mak ami hili tema atu hala’o bá semináriu ne’e mak oinsá ita fó bá jerasaun foun sira kona-ba sira-nia estuda personalidade, no tema seluk mak ami ko’alia kona-ba disiplina pozitiva, tanba sá mak tenki estrutura personalidade, tanba estrutura personalidade ne’e sai hanesan baze importante bá dezenvolvimentu umana ka indivídu ida,” esplika nia.

Nia hatuta, kona-ba dezenvolvimentu fíziku laiha problema, tanba hetan asisténsia husi hahán ne’ebé di’ak no nutritivu, hodi reforsa kondisaun fízika, tanba ne’e, presiza mellora liután estrutura personalidade hodi kontribui bá dezenvolvimentu umanu.

Alem ne’e, liu husi semináriu refere mós, bele hakle’an liután joven jerasaun foun sira-nia kuiñesimentu hodi halo ekilíbriu bá sira-nia psikolojia, nune’e bele halo interasaun ne’ebé di’ak no pozitivu entre sira ho família, komunidade no sosiedade.

Fatin hanesan, partisipante husi husi Eskola Nossa Senhora de Fátima Balide, Alexandre Soares hatete, nia sente kontente partisipa iha semináriu ne’e, tanba bele aumenta tan nia kuiñesimentu siénsia psikolojia nian.

“Ha’u sente kontente tanba bele hasoru ambiente ne’ebé foun, tanba bele kuiñese mós iha parte siénsia iha parte psikolojia nian, tanba iha parte psikolojia nian professor Leonardo bele lori buat foun esplika mai ha’u, tanba durante ne’e ha’u-nia kuiñesimentu jerál kataj, psikolojia ne’e iha parte hanesan ne’e de’it, maibé ohin ha’u bele hakle’an oituan kona-ba matéria psikolojia,” dehan nia.

Entretantu, partisipa iha semináriu ne’e mai husi estudante husi Eskola Nossa Senhora de Fátima Balide hamutuk na’in 18, inklui mós estudante husi sentru formasaun SQR nian.

Oradór bá semináriu ne’e mai husi dosente husi Universidade Nasionál Timor Lorosa’e (UNTL) na’in-rua mak hanesan, Professór Leonildo da Costa ne’ebé lori matéria kona-ba estrutura psikolojia. Enkuantu, Professór Leonardo Fernandes, aprezenta matéria kona-ba disiplina pozitivu.(ant)