‘Somotxo’ : PN Kontinua Fó Fi’ar Xanana Lidera Negosiasaun Fronteira Terrestre TL-Indonézia

Smnewstl.com 21-01-2022 (Dili) — Parlamentu Nasionál (PN) kontinua fó fi’ar bá Xefe Negosiador Prinsipál Bá Delimitasaun Difinitiva Fronteira Marítima, Kay Rala Xanana Gusmão atu lidera negosiasaun foun bá fronteira terrestre entre Timor-Leste ho Indonézia, ne’ebe seidauk remata.

Prezidente Komisaun B PN, Deputadu José Agostinho Sequeira ‘Somotxo’ hateten, komisaun B PN konvida Gabinete Fronteira Marítima liderado  Kay Rala Xanana Gusmão atu esplika pontu de situasaun kona-ba fronteira marítima entre Timor-Leste ho Austrália ne’ebé akórdu ratifika ona iha PN.

Iha audiénsia ne’e, Gabinete Fronteira Marítima mós aprezenta kona-ba prosesu negosiasaun bá fronteira terrestre entre Timor-Leste ho Indonézia, tanba negosiasaun fronteira terrestre entre Timor-Leste ho Indonézia ne’e to’o ona 90%.

Maibé sei falta segmentu ida liu-liu kona-ba markasaun iha fronteira Naktuka no fatuk Sinai mak Indonézia konsidera la’ós soberania Timor-Leste nian.

Somotxo esplika, maske fatuk Sinai la hakerek iha konstituisaun RDTL, tuir plataforma kontinentál, fatuk Sinai pertense bá territóriu Timor-Leste nian, la’ós Indonézia.

“Problema ne’e fatuk Sinai ne’ebé hanesan Indonézia konsidera dehan, laiha ita-nia konstituisaun, maibé liu husi plataforma kontinentál, Oe-cusse ne’e ita bele dehan, ita-nia plataforma ne’e to’o iha ne’ebá, agora tuir konstitusaun konserteza ita la sita iha ita-nia fatuk Sinai ka illa ruma iha parte Oe-cusse,” dehan Deputadu Somotxo, iha PN sesta ohin.

Somotxo hatutan, fronteira terrestre hanesan iha Mota-ain Munisípiu Bobonaru to’o Mota-ain Munisípiu Covalima ne’ebé fronteira ho Indonézia ne’e rezolvidu ona, maibé sei iha problema balun iha markasaun ne’ebé uluk tau.

Enkuantu iha Oe-cusse mós rezolve ona balun, sei falta de’it mak iha área Naktuka ne’ebé liga bá fatuk Sinai mak sei iha hela faze negosiasaun.

“Bá Oe-cusse problema hotu-hotu rezolvidu tiha ona, só Citrana, Naktuka ligadu bá fatuk Sinai, ne’e mós negosiasaun la’o tiha ona kuaze 90%. Ohin ne’e atu ko’alia segmentu Naktuka hanesan negosiasaun foun entre Indonézia ho Timor-Leste, hahú husi Batugade bá Ataúro, Ataúro bá Jaco,” dehan nia.

Negosiasaun bá fronteira terrestre entre Timor-Leste ho Indonézia ne’e sei lidera nafatin husi Xanana Gusmão, tanba servisu ne’ebé estadu fó seidjak remata.

“Konserteza tanba servisu ne’ebé estadu fó bá Maun Boot Xanana seidauk konklui, tanba ne’e mak fronteira marítima konklui tiha ona, agora fronteira terrestre entre Timor-Leste ho Indonézia,” dehan nia.

Sorin seluk, Xefe Negosiadór Prinsipál bá Delimitasaun Difinitiva Fronteira Marítima, Kay Rala Xanana Gusmão hateten, prezensa iha Komisaun B PN, atu esklarese de’it kona-ba servisu ne’ebé Gabinete fronteira marítima halo tiha ona, saida mak sei halo.

“Atu esklarese de’it katak, ekipa husi Gabinete fronteira marítima, Komisaun B Prezidente mak Señór Somotxo konvida ami atu mai fó hatene saida mak la’o dadauk ona, saida mak sei halo saida mak halo tiha ona, ne’ebé ami fó hatene tiha ona mak ne’e de’it,” dehan Xanana Gusmão.

Eis Primeiru-Ministru ne’e subliña, Komisaun B PN ne’ebé trata bá assuntu negósiu estranjeiru no defeza ho seguransa, tanba ne’e, sira presiza akompaña didi’ak negosiasoens fronteira terrestre ho marítima Timor-Leste nian.

“Komisaun B PN haree bá polítika externa ho defeza no seguransa, tanba ne’e mak presiza akompaña didi’ak negosiasoens fronteira terrestre ho marítima, mak bolu ami mai ohin ami aprezenta tiha ona,” afirma Xanana.(ant)