Sinzas Saudozu Max Sthal Sei Halot Iha Fatin Subar Kasete

Smnewstl.com 25-11-2021 (Dili) – Komisaun organizadora bá preparasaun ho Komité 12 Novembru, CAMSTL no mós tékniku enjiñeru sira observa ona fatin ne’ebé atu halot sinzas Saudozu Jornalista Señór Max Stahl iha Semitériu Santa Kruz Dili, inklui fatin harii monumentu Max Stahl nian.

Iha observasaun ne’e, parte sira konkorda malu atu halot sinzas Saudozu Max Stahl nian iha kedas fatin ne’ebé uluk nia subar kasete no foti hela imajen bá movimentasaun manifestante sira iha Semitériu Santa Kruz laran inklui imajen balun ne’ebé militár Indonézia baku hela demostrante sira.

Prezidente Komité 12 Novembru, Grigório Saldanha hateten, Komité 12 Novembru ho Komisaun Organizadora deside halot sinzas Saudozu Max Stahl nian iha kedas fatin ne’ebé uluk nia subar kasete husi imajen ne’ebé nia foti, bainhira militár Indonézia baku hela demostrante sira.

Tanba tuir Grigório Saldanha katak, iha nafatin ne’e mak momentu ne’ebá Saudozu Max Stahl subar kasete ne’e atu salva imajen no mós kasete ne’e bele salva Timor-Leste iha mundu internasionál.

“Espesífikamente fatin ne’ebé uluk maun Max Stahl subar rollu filme manifestasaun 12 Novembru no Masakre Santa Kruz, rollu Masakre Santa Kruz ne’e mak salva Timor-Leste iha mundu internasionál ne’ebé ita kuiñese ho naran pontu nakfila, ne’ebé problema Timor-Leste ne’e sai nakloke iha mundu tomak, mundu tomak hakfodak problema Timór sai populár liu iha mundu,” dehan Grigório Saldanha, iha Semitériu Santa Kruz, Dili, kinta ohin.

Alem de haree fatin deskansa ikus Max Stahl nian, Grigório Saldanha dehan, sei halo mós monumentu iha fatin ne’e no mós sei hakerek narasaun ruma hodi esplika istória signifikadu husi fatin ne’e.

“Ita hanoin mós, alem de halo fatin bá tau ninia sinzas, depois mós halo narasaun ruma esplika buat ruma ho plaka ruma depois halo mós nia monumentu, tanba nia funsaun hanesan jornalista mais nia halo buat rua importante, nia subar rollu ne’e iha ne’e par rollu ne’e bele salva fali Timor-Leste iha mundu,” dehan Grigório.

Prezidente Komité 12 Novembru ne’e dehan, komité iha ona hanoin atu harii monumentu Saudozu Max Stahl nian iha fatin refere, nune’e valór istóriku husi fatin ne’e labele lakon.

“Ita hanoin nafatin fatin ne’e par nia valór istóriku labele lakon, no nia hanesan jornalista ho nia kolega sira seluk ké filma hela movimentasaun manifestante sira balun halai tama mai, balun ema baku hela. Ne’ebé ita sei chek fali dokumentu sira-ne’e par atu tau ninia estátua ne’e nia foka loos bá ida-ne’ebé,” tenik nia.

Konstrusaun bá momentu Max Stahl nian ne’e, Grigório Saldanha informa, sei iha faze ikus, tanba foku prinsipál komité nian mak hamutuk ho komisaun organizadora atu halot sinzas Saudozu nian.

“Depois fatin ne’e ita prepara hela, aban bairua kuandu, atu halo buat ruma iha ne’e mós tenki iha ligasaun ho konstrusaun monumentu 12 Novembru tomak, iha armonia, entaun tenki ajusta ho fatin sira-ne’e hotu,” tenik nia.

Kona-ba nia estátua, maka komité ho tékniku se haree didi’ak par armonia ho projetu ne’e tomak, nune’e evita labele halo tiha mak sobu bá mai, tan ne’e, ajusta kedas fatin par obra ne’e la’o to’o hotu labele bok buat ida ona.(ant)