Sinzas Saudozu Max Stahl to’o Iha CAMSTL, Ba ho Isin, Fila ho Akudesan

Smnewstl.com 15-12-21 (Dili) — Triste hafutar matawen husi funcionario Centru Audiovizual Max Stahl Timor-Leste (CAMSTL) simu Max Sthal nia akudesan iha knar fatin Benfica Dili, fatin ne’ebe Saudozu hakna’ar a’an ba.

Espresaun emosional ne’e expresa tamba la imagina atu lakon Saudozu ne’ebe hanesan mos responsavel ba Sentru Audiovizual Max Stahl Timor-Leste (CAMSTL) ne’e.  Tuir sira, Max Sthal laos deit Xefe iha servisu fatin, maibe mos hanesan ema inspirador ida ne’ebe sempre iha sira nia fuan durante tinan 20 resin.

Ba sira, Isin maka mate, maibe memoria ho istoria sei konta husi jerasaun ba jerasaun. Laos deit husi funcionario (CAMSTL), maibe mos povu Timor Leste tomak, tamba koalia kona ba Max Sthal, koalia mos kona ba istoria Timor Leste ne’ebe nakfilak husi situasaun ida ba realidade.

Saudozu termina peregrinasaun iha loron 27 Outubro 2021 kauza husi sofrementu moras ne’ebe infrenta. Familia halo’ot ona Saudozu iha Australia no ninia akudesan maka foin to’o hikas mai Timor Leste, Kuarta-feira, (15-12-2021), simu direitamente husi lideransa nasional rua, Kay Rala Xanana Gusmao no Premiado Nobel da Paz, Jose Ramos Horta, hafoin intrega ba Governo hodi kontinua konvoi heleu sidade Dili molok lori ba nia horik fatin iha tuku 2 meudia.

Iha CAMSTL, simu direitamente husi Prezidente Konsellu Imprensa, Virgílio Guterres ho poezia Saudozu Francisco Borja da Costa nian, hafoin lori tama bá rai iha fatin ne’ebé komisaun organizadora prepara.

Antes hatama bá uma laran, membru board CAMSTL sira hamutuk kari aifunan nu’udar simbolu Bem-vindo bá saudozu nia sinzas.

Tuir oráriu, hahú tuku 6 kalan sei loke bá públiku no entidade estadu no privadu, atu bá presta omenajen ikus bá saudozu nia sinzas. Tuir oráriu mós, sinzas Saudozu nian sei tau durante loron 3, hahú iha loron 15 to’o loron 17 fulan Dezembru, no sei lori bá missa rekuém iha Igreja Motael ne’ebé sei prezide husi Archebispu Arkidioseze Metropolitana Dili, Dom Virgílio do Carmo da Silva.

Hafoin missa sei lori bá halot iha fatin deskansa ikus nian iha Semitériu Santa Cruz, fatin ne’ebé iha trajédia Masakre Santa Cruz 12 Novembru 1991, ne’ebé nia subar kasete imazen torturasaun husi militár Indonézia bá joven sira.

Liu husi imagem hirak ne’e mak loke hikas mundo internacional nia matan kona ba brutalismu husi liman kroat Indonesia nian ba timoroan hodi nakfilak ba ukun rasik a’an.

Governu Presta Apresiasaun Boot Bá Kontribuisaun Max Stahl

Iha Aeroporto Internacional Nicolao Lobato, Comoro Dili, Ministru Prezidénsia Konsellu Ministru, Fidélis Magalhães, lori oitavu governu konstitusionál hato’o apresiasaun boot bá kontribuisaun saudozu Max Stahl iha prosesu luta bá Ukun Rasik Aan (URA) Timor-Leste nian.

Kontribuisaun boot ne’ebé Max Stahl halo hodi kontribui bá ukun rasik aan Timor-Leste nian ne’e, liu husi filmajen ne’ebé nia foti iha akontesimentu Masakre Santa Cruz 12 Novembru iha tinan 1991, iha Semitériu Santa Cruz.

Tanba, liu husi imajen ne’ebé nia foti maka, haruka bá mundu internasionál hodi hatene katak, militár Indonézia kontinua halo torturasaun no oho Timoroan sira.

Tan ne’e, Fidélis Magalhães lori Primeiru-Ministru no oitavu governu konstitusionál nia naran, fó onra bá Timoroan hotu, no mós líder nasionál hanesan Kay Rala Xanana Gusmão ho José Ramos-Horta ne’ebé fó biban hodi simu ona sinzas Saudozu Max Stahl nian ne’ebé foin transporta husi Austrália mai Timor-Leste ho aviaun Qantas.

“Ita hotu kuiñese Max no hadomi Max, ita barak mak bele hamrik iha ne’e bele goza ukun rasik aan ida-ne’e, tanba nia halo nia servisu no fó sai ita-nia situasuan ita-nia istória bá mundu,” dehan Ministru Fidélis Magalhães, hafoin simu sinzas Saudozu Max Stahl nian iha salaun VIP, Aeroportu Internasionál Prezidente Nicolau Lobato, Comoro, Dili, kuarta ne’e.

“Ho ida-ne’e, husi parte governu nian hakarak fó Bem-vindo bá Max no oan sira no bá ita hotu ne’ebé mak iha ne’e, espressa ita-nia apresiasaun boot bá ninia servisu hotu, bá ninia sakrifísiu ne’ebé nia halo kontribui bá Timor-Leste, tantu tempu uluk nian no tempu hafoin ita ukun rasik aan,” hatutan nia.

Porta-voz Governu ne’e mós husu timoroan hotu atu partisipa másimu hodi fó onra bá memória Saudozu Max Stahl nian, tanba Max Stahl faz parte nu’udar sidadaun Timor.

“Espíritu Max ne’ebé loloos husi Inglaterra, maibé momentu ida-ne’e nia Timoroan hanesan ita hotu ne’ebé hamrik iha ne’e. Ne’ebé nia faz parte husi ita-nia istória ita-nia aan, nune’e mós ninia família,” tenik nia.

Fidélis fi’ar katak, Espoza Saudozu Max Stahl ho nia família sira, mantein ligasaun nafatin ho povu Timor-Leste, maske Max Stahl fila hikas ona bá mundu seluk.(ant)