Sinza Max Stahl To’o TL Iha 15 Dezembro, Sei Simu Husi Xanana Ho Ramos-Horta

Smnewstl.com 25-11-2021 (Dili) – Tuir planu sinza saudozu Jornalista Max Stahl nian sei to’o husi Austrália mai Timor-Leste iha loron 15 fulan Dezembru, ne’ebé sei simu direta husi Eis Komandante Ein-xefe das FALINTIL, Kay Rala Xanana Gusmão ho Premiadu Nobel bá Páz, José Ramos-Horta no akompañadu husi parada Militár.

Prezidente Komisaun Organizasaun, Silveiro Pinto Baptista konfirma, komisaun organizadora prepara ona sekuénsia programa importante tolu bá iha serimónia funerál saudozu Max Stahl nian.

Iha simu sinzas ne’e, Silveiro Pinto Baptista hateten, Premiadu Nobel bá Páz, José Ramos-Horta sei reprezenta frente diplomátika, tanba Max Stahl iha ligasaun di’ak ho delegasaun frente diplomátika sira iha li’ur, enkuantu Xanana Gusmão sei reprezenta frente armadas ho frente klandestina.

“Maun Ramos-Horta reprezenta frente diplomátiku sira, tanba saudozu Max ne’e iha ligasaun ho ita-nia istória luta ninian, entaun maun Ramos-Horta reprezenta sira-ne’ebé mak luta iha frente diplomátiku. Maun Xanana reprezenta frente rua, frente klandestina no mós frente armadas, sira na’in-rua mak sei simu husi família,” dehan Silveiro Pinto Baptista, iha Semitériu Santa Cruz, Dili, kinta ne’e.

Tuir tradisaun kultura Timór nian, sei simu ho sarigala hafoin entrega bá parada militár lori bá iha sala espera VIP Aeroportu Internasionál prezidente Nicolau Lobato Comoro, Dili.

Prezidente Komisaun Organizadora ne’e haktuir, iha sala VIP Aeroportu, sei simu fali husi governu ne’ebé sei reprezenta husi Ministru Prezidénsia Konsellu Ministru, Fidélis Magalhães, no mós sei halo komferénsia imprensa.

“Guci sei entrega bá parada militár ne’e sei hakoak tais, depois parada militár ne’e marsa tama mai iha fatin sala espera VIP. To’o iha ne’ebá, ofisiál estadu ou governu Timor-Leste sei simu, ita planu ne’e sei simu husi Ministru Fidélis depois iha ne’ebá, Ministru Fidélis sei halo komferénsia imprensa hodi esplika prosesu sira-ne’e,” tenik nia.

Hafoin sai husi Aeroportu Comoro, saudozu nia sinzas sei tula iha kareta funeráriu no halo konvoi hadulas kapitál Dili, hafoin bá deskansa iha saudozu nia fatin Sentru Audiovizual Max Stahl Timor-Leste (CAMSTL) iha Bemfica, Dili.

“Ajenda segundu mak presta omenajen, ita sei hahú husi órgaun soberanu sira, depois órgaun titulares, tuir ona sekuénsia programa ne’ebé mak ita prepara, ne’e husi dia 15 to’o dia 17 dader,” subliña nia.

Nia hatutan, sinzas saudozu Max Stahl nian sei tau durante loron tolu, hahú husi loron 15 to’o loron 17, nune’e órgaun soberanu estadu nian, eis titulár no entidade seluk tan hodi bá presta omenajen ikus hafoin lori bá misa rekuém iha Igreja Motael.

“Iha dia 17 dader purvolta 8:30, saudozu nia ita lori sai husi CAMSTL ita hodi marsa bá iha Igreja Moteal par atu selebra misa eukarista bá saudozu, tanba saudozu mós hanesan ema kristaun, komisaun organizadora sei ko’alia ho Amu Párku,” nia hatutan.

Alem de ne’e, eis Provedor PDHJ ne’e dehan, sei konvida Archebispu Arkidioseze Dili, Dom Virgílio do Carmo da Silva atu bele selebra misa, hamutuk ho amu co-selebrante sira hanesan, Padre Domingos Maubere, Padre Juvito do Rego, Francisco Barreto no seluk tan.

Hafoin remata misa rekuém, konvidadu hamutuk ho komisaun omenajen sei lori saudozu Max Stahl nia sinzas ho marsa la’o ain husi Igreja Motael bá halot saudozu nia sinzas iha Semitériu Santa Cruz.(ant)