SIJK-MS Abandona Ema ho Difisiensia

Smnewstl.com Media Online — Asosiasaun Halibur Difisiensia Matan Timor-Leste (AHMDTL) konsidera, ekipa Sala Situasaun Sentru Integradu Jestaun Krize (SIJK) ho Ministériu Saúde (MS) abandona no ignora sira, bainhira membru AHMDTL na’in-8 infetadu bá Covid-19.

Ho atendimentu SIJK ho ministériu saúde ne’e, lideradu, Gaspar Afonso, ho ekipa hasoru malu ho Primeiru-Ministru, Taur Matan Ruak, ne’ebé hanesan mós komandante operasional bá sala situasaun SIJK, nune’e bele fó hanoin bá ekipa SIJK ho ministériu saúde atu fó treinamentu bá pasiente Covid-19 sira labele iha diskriminasaun.

Diretór Ezekutivu AHMDTL, Gaspar Afonso hateten, membru AHMDTL na’in-8 mak infetadu ona bá Covid-19 no kumpre auto-izolamentu iha uma, maibé sira la hetan kontrolu husi parte saúde sira.

“Iha ha’u-nia organizasaun ne’ebé ha’u lidera ne’e iha na’in 8 afeta pozitivu, maibé la fó atendimentu, la bá kontrola, ida-ne’e ami sente diskriminadu. Sira auto-izolamentu iha sira-nia uma de’it, ami tenta sira atu bá haree mós sira la bá, semana ida rua liu tiha mak sira foin bá vizita, ne’e kan la lójika, tanba sé ami la fanun entaun ema abandona tiha ami ka ema ignora tiha ami, tanba ne’e mak ami mai,” informa Diretór Ezekutivu AHMDTL, Gaspar Afonso, hafoin remata enkontru ho Xefe Governu, iha rezidénsia Farol, Dili. Sesta (23/07/21).

Gaspar Afonso argumenta, liu husi sorumutu entre AHMDTL ho Xefe Governu ne’e, atu bele fó hanoin, nune’e bá futuru karik ema ho difisiensia ruma hetan pozitivu, labele iha tan diskriminasaun.

“Entaun ita mai fó hanoin bá suaexelénsia, karik iha futuru akontesimentu bá ema ho difisiensia sira hetan pozitivu karik, parte relevante sira bele fó atendimentu imediatamente, tanba situasaun pasadu ita hetan diskriminasaun, tanba ne’e mak hanesan sidadaun ita mai fó hanoin bá suaexelénsia hanesan ezekutivu hanesan aman ida bá rai ida-ne’e,” afirma Gaspar.

PM Taur mós louva ho grupu AHMDTL, tanba bele mobiliza membru sira hodi simu vasina kontra Covid-19.

“Primeiru-Ministru mós louva ami-nia inisiativa, tanba ha’u orienta ona ami-nia ema sira vasina hotu ona, balun doze segundu hotu ona, ami semana oin tan parese doze segundu hotu ona, tanba ami bele ho kondisaun difisiensia mós ami obdese,” haktuir nia.

Nia realsa, membru AHMDTL na’in 38.118, nia direitu kongrasa ona iha konstituisaun RDTL artigu 21, iha artigu 16 mós iha alíñea 2 ne’e dehan, la haree bá rasa, kór, fíziku, étniku no mentál.

PM Taur rekoñese preukupasaun ne’e, no husu diskulpa ba membru AHMDTL tomak, bá eru ne’ebé akontese ona.

To’o informasaun ne’e sai parte MS-SIJK seidauk aprezenta pozisaun. (ant)