Sidadaun Xineza Rua Tá Malu Iha Hudi-Laran, 1 Suku Ponto 13

Smnewstl.com 12-10-2021 (Dili) – Iha Tersa-feira dader ne’e, sidadaun Xina na’in-rua lori katana tá malu iha área Hudi-Laran, Dili ne’ebe rezulta nain ida sofe kanek todan no suku ponto 13.

Komandante Polísia Munisípiu Dili, Superintendente Xefe Polísia Henrique da Costa hateten, hafoin insidente ne’e polísia to’o kedas iha tereinu nune’e evakua ida ne’ebe sofre kanek bá Ospitál Nasionál Guidu Valadares (HNGV) hodi halo tratamentu.

Nia hatutan, suspeitu oras ne’e dadauk, detein ona iha sela detensaun polísia eskuadra Dom Aleixo, hodi halo identifikasaun, nune’e bele aprezenta bá ministériu públiku hodi prosesa bá tribunal.

“Ohin dader mós iha akontesimentu insidente iha área Hudi-Laran iha Timor foun ninian, iha sidadaun estranjeiru na’in-rua husi nasaun Xina hotu ne’ebé mak tá malu, ita-nia parte patrulla lori kedas bá iha eskuadra, suspeitu agora detein hela iha sela detensaun Don Aleixo ninian, tanba iha tempu sira lanu, dalaruma iha karaoke depois sira lanu mak sira uza sasán kroat tá malu,” dehan Superintendente Xefe Polísia Henrique da Costa iha servisu fatin Komandu Polísia Munisípiu Dili, tersa ohin.

Vítima sidadaun xinés seluk ne’e mós, oras ne’e dadauk alta no fila ona bá uma, hafoin suku pontu 13 iha HNGV, tanba hetan tá husi nia maluk xina ida.

“Vítima lori kedas bá iha ospitál nasionál hodi hetan tratamentu, vítima agora bele fila uma ona, mais suku pontu 13, ita-nia parte investigasaun mós hala’o ona komunikasaun ho prokuradór par prosesu ne’e bele la’o iha Ministériu Públiku ho di’ak,” Henrique dehan tan.

Komandu Polísia Munisípiu Dili liu husi servisu investigasaun kriminál, komunika ona ho parte prokuradór, nune’e bele kontinua bá iha dalan legál.(ant)