Semana Kotuk, Poltras Rejista Asidente 24 no Hatama Osan Bá Kofre Estadu Rihun $2.924

Smnewstl.com 22-11-2021 (Dili) – Polísia Nasionál Timor-Leste (PNTL) liu husi Seksaun Tránzitu Nasionál durante semana ida bá kotuk, rejista kazu asidente hamutuk 24 no lakon vida nain ida.

Komandante Polísia Tránzitu Nasionál, Inspetór Xefe Domingos Sarmento Gama haktuir, husi kazu asidente 24, gráve 2 kanek kman 15 no na’in ida maka lakon vida.

“Semana kotuk, ita iha Dili totál kazu asidente iha 24, asidente fatal ga ema mate ida no kanek todan 2 kanek kman 15. Prosesu hirak ne’e balun la’o hela, ida kazu fatal ne’e mak ita haruka ona bá Ministériu Públiku, kazu sira seluk ita hein hela kompletu ita sei haruka bá Ministériu Públiku,” dehan Inspetór Xefe Domingos Sarmento Gama, iha knár fatin Komandu Munisípiu Dili, segunda ne’e.

Nia hatutan, iha deit semana kotuk mos Polísia Seksaun Tránzitu Nasionál hatama osan bá kofre estadu hamutuk rihun $2.924 inklui prende evidénsia mak hanesan kareta ho motorizada hamutuk 15.

“Iha mós parte infrasaun, iha semana kotuk, ita mós konsege hatama osan $2.924 dólar, ita prende evidénsia hamutuk 53, ne’e motorizada ho kareta hamutuk,” tenik nia.

Kona-ba estasionamentu ilegál ne’ebé kontinua para kareta no motorizada iha área hanesan Palásiu Governu nia oin, no mós Embaixada Portugál nian.

Inspetór Xefe ne’e afirma, Polísia Tránzitu sempre aviza beibeik liu husi média atu utilizador sira labele para kareta no motor iha troatoar leten, tanba troatoar ne’e utiliza ba ema la’o ain. Maibé realidade, motorista sira laiha konsiénsia umanu, no kontinua para iha troatoar leten iha área Palásiu Governu oin no mós Embaixada Portugál oin, maski aplika ona selu koimas bá sira.

“Ita-nia operasaun kona-ba estasionamentu ilegais sira-ne’e, durante ita-boot sira akompaña direta, liu kanál ita-boot sira-nian, ita-boot sira avizu beibeik bá iha komunidade par hodi respeita lei kódiku estrada, sira lubuk ida mós ita pasa ona infrasaun bá sira, maibé realidade ita kestiona, tanba sempre falta konsiénsia sidadaun sira-nian,” subliña Domingos.

Maiki nune’e, Polísia Tránzitu kontinua implementa lei kódiku estrada bá sidadaun sira, atu nune’e sira bele konsiénsia no respeita kódiku estrada atu evita asidente rodoviáriu iha Timor-Leste.(ant)