Semana 2 Ona Pulsa TT $ 1 Lakon Iha Mercado, Kompanha Timor Telecom ‘Nonok’

Smnewestl.com 12-12-21 (Dili) — Vendedór ho kliente Timor Telecom (TT) sira sente preukupadu, tanba kuaze semana rua ona pulsa ho presu dólar $ 1 to’o dólar $ 5 hahú la fa’an ona iha públiku. Situasaun ne’e hamosu espekulasaun iha sosiedade hodi ‘du’un’ kompanha Timor Telecom hahú explora kliente sira ne’ebé durante ne’e utiliza Sim Card Timor Telecom.

Adelino Pinto Vendedór ne’ebé durante ne’e fa’an pulsa TT iha Largo Lesidere husu empreza Timor Telecom atu esklarese bá kliente sira no mós públiku tomak nune’e la hamosu espekulasaun negativo.

“Ha’u hakarak husu, tanba saida mak sira halo lakon derepente tiha pulsa Timor Telecom dólar $ 1 ne’e.? Bainhira mak iha fali para ami bele ba hola hodi haknauk fali nune’e apoio ba sustenta ami-nia uma laran. Ema hotu mai hola pulsa sempre husu, tamba saida mak pulsa dollar ida ne’e laiha,”dehan Adelino hodi kestiona.

Vendedór ne’e husu empreza Timor Telecom atu klarifika bá públiku, tanba pulsa dólar $ 2 to’o dólar $ 5 mós hahú lakon tan ona iha públiku, maibé Sim Card kontinua ejiste nafatin. Nia hatutan, tuir informasaun ne’ebé sira simu katak, sei mosu fali pulsa dólar $ 3 nian.

“Agora $ 2 dólar to’o $ 5 dólar lakon tan ne’e nusa mak Sim Card ne’e sei iha, depois ema lori saida mak atu enxe. Ami bá husu iha agen Xína sira-nian mós laiha hotu, apakah sira mak manobra buat ne’e karik, besik atu semana rua ona atu lakon, ami rona fali dehan $ 3 dólar ami lahatene, ne’e $ 3 dólar serake povu baibain sosa bele ga la’e,” kontinua kestiona Adelino.

Sorin seluk, Vendedór Pulsa Timor Telecom iha areadores Palásiu Governu, José Guterres reforsa katak, konfirma ona ho parte agensia Timor Telecom nian no klarifika katak matéria prima ba produsaun pulsa dollar ida nian mak hotu no seidauk to’o husi Portugal mai Timor Leste.

“Pulsa Timor Telecom ne’e ami sosa antes tiha ona mak ami ka’er hela ne’e, depois kolega sira bá fali kan laiha ona, entaun ami bá konfirma sira dehan, material ida-ne’e mai husi Portugal ne’ebé sei iha hela dalan seidauk to’o, hafoin mai mak bele distribui,” dehan José Guterres.

Maske pulsa Timor Telecom hahú menus dadauk, maibé Vendedór José dehan, pulsa ne’ebé sei iha, sira fa’an ho presu nafatin, tanba ne’e sei la hasa’e folin pulsa nian.”La aumenta ida, ami fa’an $ 2 dólar $ 2 dólar nafatin, $ 1 dólar $ 1 dólar nafatin,” dehan nia.

Pulsa ne’ebé vendedór ne’e fa’an, sosa tutan husi ema iha kapasidade finanseira bo’ot ne’ebe sosa ona antes iha Timor Telecom hafoin distribui tutan.

Sorin seluk, tuir informação ne’ebé mak redação SMnewstl asesu husi pessoal técnico operador telecomunicação TT ne’ebé rejeita atu pública nia identidade informa katak, kazu pulsa TT $1 lakon ne’e kuaze fulan ida resin ona, ne’ebé deskonfia makas katak, iha trabalhador balun ne’ebé babain lori sai pulsa ba agente TT nian mak “foti na’ok” pulsa TT $1 kuaze kaixa tomak 3 ho kuantidade osan por volta dollares americano rihun 40.

Hafoin lori sai pulsa ne’e, ba fa’an iha kios balun, no cliente sira hahú reclama ba operador telecomunicação TT, tanba bainhira sosa no enxe maioria inválido. Nune’e parte operador telecomunicação TT deside bloceia kedas número serial pulsa nian.

Enkuanto tuir pessoal técnico ne’e dehan, kazu refere oras ne’e seidauk sai consumu público, ho razaun katak, parte direção marketing sei halo hela investigação internal. Relaciona ho problema refere mak prejudica tebes cliente sira atu sosa pulsa TT $1 iha kios no loja sira.

Pulsa TT ne’ebé lakon no bloceia ona nia número serial, operador telecomunicação TT sei re-ativa hikas hafoin kazu ne’e iha ona solução.

Além de ne’e, relaciona ho problema pulsa TT lakon ne’e, kuaze kios sira iha area rural no remotas, komesa fa’an pulsa TT $1 nian sa’e ba $1.50.

Ba problema ne’e, bainhira SMnews komfirma ho kompanha Timor Telecom diresaun informasaun ho numeru 172 esklarese, pulsa nia estok mak seidauk to’o nune’e seidauk bele distribui ba kliente sira. Enkuuanto iha Timor Telecom fasiilita pulsa husi $ 0,50 cent, 1 dollar to’o 20. Ba sidadaun sira hotu ne’ebe hakarak asesu ba pulsa $ 1 hanesan ne’ebe kestiona bele hakbesik ba iha lojas Timor Telecom.

Hata’an kona ba informasaun pulsa lakon, parte informasaun rezeita atu fo komentario tamba laos kompotensia. Nune’e sujere karik hakarak hetan informasaun klaru bele direitamente hakbesik ba iha Marketing Timor Telecom.

Ligado ho loron Domingo ne’ebe konsiderado hanesan loron feriadu, nune’e parte SMnews seidauk bele halo komfirmasaun ho responsavel CEO Timor Telecom inklui marketing rasik. SMnews tenta komfirma numeru kontaktu, maibe la hetan. (Ant)