Selebrasaun Festa Natal Iha Dili, 2 Mate, 4 Kanek Todan

Smnewstl.com 27-12-21 (Dili) — Durante selebrasaun festa natál iha loron 24 no dia 25 Dezembru foin lalais ne’e, Polísia Nasionál Timor-Leste (PNTL) Munisípiu Dili, rejista kazu asidente tráfiku hamutuk 8.

Kondisaun motorizada ne’ebe asidente selebrasaun festal natal no dadaun ne’e iha hela Komando Polisia Municipio Dili, 27-12-2021. Foto Smnews Joao da Silva Guterres  

Husi asidente tráfiku 8 ne’e, rezulta asidente gráve 2, ne’ebe nain 2 la konsege salva vida, enkuanto no na’in 4 seluk sofre kanek todan no kman.

Komandante PNTL Munisípiu Dili, Superintendente Xefe Henrique da Costa informa, molok tama bá selebrasaun festa natál, Komandu Polísia koloka ona membru bá iha igreja no kapela sira hodi fó seguransa bá komunidade.

“Iha dia 24 ho dia 25 ne’e iha asidente tráfiku 8 ne’ebé mak rezultadu asidente fatal ne’e iha 2, ema mate 2 depois kanek todan no kanek kman hamutuk 4n ne’ebe parte Polisia tránzitu mak atende hanesan iha área Na’in Feto, Cristo Rei no mós Dom Aleixo ninian,” informa Superintendente Xefe Henrique da Costa iha Komandu Polísia Munisípiu Dili, Segunda ne’e.

Henrique da Costa sublinha, Polísia eskuádra mós rejista kazu asidente tunggal ga monu rasik, tanba ho kondisaun lanu, bainhira oin moos sei haruka fila bá ida-idak nia uma.

Enkuantu detein mós motorista ne’ebé kondús motor balun iha sela detensaun Polísia Munisípiu Dili durante oras 72 aprezenta bá Ministériu Públiku, tanba lori motor laiha karta kondusaun.

“Ita mós detein ema ne’ebé lori motor laiha karta kondusaun, entaun ita detein iha sela detensaun Polísia Munisípiu Dili nian durante 72 oras hodi aprezenta bá Ministériu Públiku,” dehan nia.

Entretantu, PNTL mós rejista kazu insidente durante selebrasaun natál rejista kazu insidente ne’ebé komete husi joven sira, tanba lanu.

Husi kazu insidente sira-ne’e, Postu Administrativu Dom Aleixo mak barak liu  kompara ho postu administrativu tolu seluk, enkuantu Metinaro ho Ataúro la rejista kazu insidente ruma.

“Iha mós insidente ga akontesimentu iha área Dili nian iha Metinaru ho Ataúro la’o normal, laiha insidente boot ruma, maibé iha postu administrativu ha’at hanesan, Vera Kruz, Cristo Rei, Dom Aleixo ho Na’in Feto mak rejista insidente hanesan joven sira tuda malu. Ne’e mós tanba lanu no mós sira-nia problema pasadu hanesan ida-idak defende ninia grupu arte marsiais ninian,” tenik Superintendente Xefe Henrique da Costa.

Superintendente Xefe Henrique da Costa relata, situasaun jerál iha kapitál Dili durante selebrasaun natál ne’e, laiha kazu signfikadu ruma ne’ebé akontese hodi prejudika atividade ema seluk nian.

Maibé, iha dia 24 kalan, PNTL konsege kaptura no detein hela iha sela detensaun Polísia Munisípiu Dili joven na’in 20 resin hodi halo identifikasaun. Ligado ho asidente hirak ne’ebe akontese, parte PNTL liderado Henrique da Costa kontinua apela ba sidadaun sira nune’e kuidadu a’an nafatin utiliza vituara li-liu ho kondisaun lanu tamba prigozu ba vida umana. (ant)