Seidauk Selu Multa, Imigrasaun Notifika Membro GAM 600

Smnewstl.com 25-10-2021 (Dili) – Membru Grupu Arte Marsias (GAM) hamutuk lima nulu (50) mak dadaun ne’e selu ona multa ba Servisu Migrasaun (SM), no falta atus neen (600) resin mak seidauk selu.

Diretór Jerál Servisu Migrasaun, Superintendente Asistente, Luís Barreto, iha serimónia handover mákina verifikadór hosi IOM ba Ministériu Interiór iha otél Novu Turismo-Dili, Segunda ne’e.

Antes ne’e, autoridade seguransa Indonézia deporta membru grupu arte marsias hamutuk 719 mai Timor-Leste, wainhira ba sa’e sintu (sabuk) iha Atambua ho ilegál no ikus mai autoridade imigrasaun halo prosesu investigasaun hodi aplika multa ba sira.

Luís Barreto dehan, membru GAM ne’ebé halo pasajen ilegal ne’e kuaze nain 50 mak selu ona koimas ba servisu migrasaun, enkuanto nain 600 seidauk.

“Agora daduak sira balun ami fó notifikasaun kuaze 50 resin mak mai selu ona koimas, sira kada ema $ 250, agora sei hein fó notifikasaun bá sira depois sira sei mai selu,” informa Diretór Jerál Servisu Migrasaun, Superintendente Asistente Polísia Luís Barreto.

Enkuantu, husi 719 ne’e, na’in 50 resin mak selu ona koimas, no sei falta membru 600 resin mak seidauk selu koima bá Servisu Migrasaun, tan ne’e Servisu Migrasaun notifika ona sira tempu badak atu selu multa bá estadu.

“Sira selu hotu ona, kala 600 resin, agora sei iha notifikasaun laran, seidauk determina notifikasaun ne’e, ha’u espera katak, iha tempu badak ne’e balun sei mai selu tan,” tenik nia.(ant)