SEESJESTV Lamenta Ho Atrazu Konstrusaun Ensinu Báziku Filiál Fatuhada

Smnewstl. com – Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Domingos Lopes Lemos lamenta ho atrazu konstrusaun Ensinu Báziku Fílial Fatuhada.

Obra ne’e hahu implementa iha tinan 2021 maibé progressu fiziku foin mak atinji porsentu 14 bazeia ba sertifikasaun husi tékniku Ministériu Edukasaun nian, maibé empresa konstrutora relata ba governu katak, konstrusaun atinji ona porsentu 20.

Durante observasaun, gobernante ne’e akompaña husi Diretór Jerál Edukasaun no Ensinu, Diretór Infrastrutura, Diretór ensínu sekundáriu jerál, xefi Departamentu Ensinu Báziku ho Engineiru hodi verifika prosesu husi implementasaun projektu ne’e.

“20% ne’e, tanba sira la haree saida mak rekomendasoes sira ne’ebé tekniku sira husi Ministèiru Edukasaun ni’an ho ADN sira fó ba sira. Tanba ida ne’e maka ohin ha’u mai ho diretor jerál no diretor nasionál ho engineiru sira hotu, hodi haree situasaun ida ne’e ho loos, atu nune’e rekomenda bele hadiak saida mak rekomendasoes sira ne’ebé hato’o husi Tékniku sira.” Tenik Governante ne’e.

Ekipa Téknika relata katak, projektu ne’e gasta ona osan hamutuk 727,422,58 no prevé konstrui uma edifisiu rua ho pisu rua, ho sala aula hamutuk 12.

Governante ne’e alerta ba Tékniku no engineiru sira husi kompañia ne’e, atu aselera konstrusaun ne’e, hodi finaliza obra ne’e entre fulan Abril no Maio tinan 2024.

” ita husu ba sira mós aselera prosesu ne’e lalais atu nune’e tinan oin tenki entrega ona mai Ministèiru Edukasaun, tanba estudante barak ne’ebé eskola iha ne’e, sira agora dadauk mós evakua tia ba eskola provisóriu, no la kleur tan udan mós mai ona tanba ida ne’e mak ita husu ba sira tenki aselera lalais edifisiu ne’e”, dehan governante ne’e.

Hafoin vizita eskola EBF Fatuhada, Governante ne’e mós vizita Eskola Ensínu Sekundáriu Jerál 5 de Maiu, Ensínu Sekundáriu Tékniku Vokasionál Komérsiu no Ensinu Sekundáriu Tékniku Vokasionál 28 Novembru Becora.(SMNews)