SEAK la Involve Iha Komisaun Organizadora Bá Expo Dubai

Smnewstl.com 22-10-2021 (Dili) – Durante preparasaun Timor-Leste bá partisipa iha Expo Dubai 2020, Sekretáriu Estadu Arte Kultura (SEAK) la involve direta iha komisaun organizadora tanba Standard Operational Procedure (SOP) mak la fó dalan.

Diretór Jerál Arte Kultura, Manuel Ximenes Smith klarifika, SEAK labele involve diretamente iha komisaun organizadora bá Expo Dubai, tanba ho kriasaun SOP ne’e rigorozu tebes, parte seluk labele halo intervensaun bá servisu autoridade Expo Dubai.

“Durante Koordenadór Expo ne’e hamrik SEAK la involve direta nu’udar komisaun organizadora atu bele haree no tetu kona-ba atividade ga aprezentasaun ne’ebé mak sei bá aprezenta iha Expo Dubai.

Sira iha SOP ne’ebé forte los katak, parte seluk labele bá halo intervensaun, loos duni ema matenek dalaruma halo hanesan ne’e,” dehan Diretór Jerál Arte Kultura, Manuel Smith, iha nia knar fatin SEAK Pantai-kelapa, Dili, sesta ne’e.

Executivo ne’e informa, kontribuisaun SEAK nian iha Expozisaun Dubai 2020 mak fó lívru ho informasaun sira ligadu ho kultura Timor-Leste nian hodi bá halo promosaun.

“Bainhira buat hotu kompletu ona, entaun sira mai husu de’it kontribuisaun husi SEAK, entun ita fó ita-nia lívru ho informasoens ne’ebé enrelasaun ho kultura Timor nian par bele fó apoiu bá ita-nia Koordenadór Expo Dubai hodi bá halo expozisaun iha ne’ebá. Maibé hakarak hatete katak, 100% fó apoiu bá atividade tomak ne’ebé mak halo iha Expo Dubai liga bá atividade promosaun,” haktuir nia.

Nia hatutan, Timor-Leste la’ós primeira-ves partipa iha Expo internasionál, tanba antes ne’e partisipa ona iha Sanhai Xina no Milano Itália, maibé expo internasionál rua ne’e la hamosu problema, tanba organizadu tebes.

Nia subliña, objetivu prinsipál husi expo internasionál sira-ne’e mak atu promove kultura Timor nian bá nasaun seluk, nune’e ema bele hatene kultura Timor nian, tanba kultura mak hanesan identidade nasaun nian.

“Ita hatene katak, esperiénsia ne’ebé mak durante ne’e Timor-Leste iha Expo Sanhai, Expo Milano ita halo kazamentu entre kultura orijen no mós kultura kontemporania, dalaruma ita sobre sai liu kultura orijen, maibé Expo nia objetivu loloos ne’e atu bá hatudu kultura Timor nian liu husi aprezentasaun dansa, atu ema la mai Timor mós komprende karakter Timor nia kultura,” afirma nia.(ant)