SEAK Ejiste Atu Prezerva, Valoriza no Promove Valór Kulturál TL

Smnewstl.com 22-10-2021 (Dili) – Diretór Jerál Arte Kulturál, Manuel Ximenes Smith esplika, Sekretariadu Estadu Arte no Kultura (SEAK) hamrik ho nia papel mak atu valoriza no Promove valór kulturál Timor-Leste nian hanesan orijinal identidade timoroan nian.

“Liga bá kompeténsia SEAK ita hatene katak, oitavu governu konstitusionál fó kompeténsia liu husi lei orgánika MESSK no SEAK ita iha planu prioridade ne’ebé mak MESSK liu-liu kona-ba prezervasaun patrimóniu kulturál no mós material,” dehan Diretór Jerál Arte Kultura, Manuel Smith, iha nia knar fatin SEAK Pantai-kelapa, Dili, Sesta ne’e.

Manuel Smith esplika, prezervasaun patrimóniu kulturál no material ne’e mak ko’alia konab orijidade kultura ema Timoroan sira-nian, tan ne’e, SEAK Hamrik atu defende ida-ne’e.

“Prezervasaun patrimóniu kulturál material ne’e, ita define bá iha buat lubuk ida. Primeiru ita-nia ko’alia kona-ba orijidade identidade kulturál ema Timor nian, ita hatene katak, SEAK Hamrik hodi fó, prezerva, valoriza, promove valór kulturál ne’ebé mak sai nu’udar ema Timor nia identidade kulturál,” dehan Smith.

Tuir polítika SEAK nian, atu servisu hamutuk ho lia-na’in no komunidade tomak atu fó protesaun bá valór kulturál sira hanesan, múzika, dansa no seluk tan ne’ebé sai hanesan identidade kulturál Timor nian.

“Ita nafatin valóriza kulturál, prezerva valór kulturál sira-ne’e, no mós rejime jurídiku n°.33/2017 ne’e mós ko’alia kona-ba prezervasaun patrimóniu kulturál material no mós inmterial,” tenki nia.

Tan ne’e, SEAK nafatin proteje valór orijinalidade hanesan dansa tradisionál ne’ebé idéntiku tuir karakterístika Timor nian husi Munisípiu sira ne’ebé hafutar ho asesores tradisionál sira hanesan, belak, kaibauk, loke, keke, morten no mós bibi fulun no seluk tan maske la taka dalan mós kultura kontemporania sira.(ant)