Sama Ain Iha Salão Oka Rudal, Xanana Louva Emprezario Timoroan ‘Mauhoka’

Smnewstl.com 22-01-2022 (Dili) – Lider Nacional, Kay Rala Xanana Gusmao, Sabado ne’e halao vizita ba iha Salao Oka Rudal 7984 ne’ebe lakaliza iha Osindo Dili. Vizita ne’e hodi hare direitamente preparasaun ba Konferensia Nacional Partido CNRT, ne’ebe tuir planu sei realiza iha Domingo aban.

Kay Rala Xanana Gusmao ne’ebe simu direitamente husi Salvador Martins ‘Mauhoka’ nain ba empreza Rudal 7984 sente hakfodak kahur ho kontenti bainhira hare direitamente Salão refere. Tuir lider nacional ne’e, Timoroan tenki hatudo esperito nasionalismu hodi investe iha nia rain rasik nune’e bele kria empregu ba timoroan sira.

Salvador ‘Mauhoka’ ne’ebe akompanha direita Xanana Gusmao lao hafutar areadores Salão introdus katak, investimentu ba Salao ne’e ne’e ho nia total gastus kuaze juta rua dollares amerikano, ne’ebe ho durasaun tempu naruk oituan.

Nia esplika, Salao refere akomula ema kuaze rihun rua resin, kompleta mos ho nia paragem kareta. Salão ne’e rasik kria empregu ba timoroan 150.

Rona tia esplikasaun ne’e, eis lider rezistensia haktuir, timoroan tenki hatudo esperito servi nune’e hamutuk dezenvolve Timor Leste. “Hau kontenti hare fatin ne’e, luan no kapas tebes, apresia ba imi,”dehan Xanana hodi doko ulun.

Ho expresaun Xanana Gusmao, ba Smnews ‘Mauhoka’ hatutan, hanesan timoroan sente orgulho ho Kay Rala Xanana Gusmao ne’ebe louva nia investimentu maske vizita refere ho objetivu seluk.

“Hau sente kontenti ho Maun Bo’ot Xanana nia prezensa, maske laos atu mai vizita fatin ne’e, maibe liu husi atividade ne’ebe realiza iha ne’e bele apresia ho saida mak ami nudar timoroan halao dadauk, ida ne’e mai hau hanesan orgulho ida,”tenik ‘Mauhoka’ ho expresaun kontenti.

Liu tan ‘Mauhoka’ komenta, dadaun ne’e kria ona empregu ba timoroan hamutuk atus nen resin, ne’ebe atus ida lima nulu iha Salao no seluk iha Kompanha Rudal 7984. Timoroan ne’e deklara, osan ne’ebe nia hetan maioria investimentu hotu iha rai laran no kria empregu ba timoroan.

Hafoin observa tia aredores sira, Xanana Gusmao mos la husik le’et hodi hasai fotografia ho funsionario hotu iha Salão Oka Rudal no husu atu servisu ho didiak. (Rio)