Salvador Husu Responsabilidade Konstrusaun Ponte Perumas-Ailoklaran ba Nicolau

Smnewstl.com 17-11-2021 (Dili) – Ministru Obras Pùblikas (MOP), Salvador Pires orienta ona Vise-Ministru MOP, Nicolau Lino Freitas Belo atu bolu urjente kompañia Segerau hodi husu responsabilidade ba konstrusaun Ponte Perumas-Ailolaran.

Salvador haktuir, konstrusaun ba Ponte Perumas-Ailoklaran liu husi despaixu Primeiru-Ministru (PM), Taur Matan Ruak ne’ebe forma ekipa task force hodi halo mitigasaun bá danus sira ne’ebé hetan estragus husi dezastre naturais iha dia 4 Abríl foin lalais ne’e.

Rezultadu husi mitigasaun ne’e maka, ekipa task force prepara planu no hetan aprovasaun husi Konsellu Administrasaun Fundu Infrastrutura (KAFI), no Komisaun Nasionál Aprovizionamentu (CNA) hodi atribui kontratu bá kompañia Segerau atu hahú halo rekonstrusaun bá ponte refere.

Ligado ho servisu ne’ebe paradu hela, Ministru Salvador Pires afirma, delega ona kompeténsia bá Vise-Ministru MOP atu reprezenta no asina kontratu sira iha KAFI, nune’e bele fó xamada atensaun bá kompañia Segerau Unipessoal Lda ne’e.

“Ha’u fó ona orientasaun bá señór Vise-Ministru, tanba nia simu ona delegasaun kompeténsia iha assuntu haree estragus sira-ne’e, nune’e mós iha Diresaun Obras Públikas tau assuntu ne’e bolu kompañia ne’e fó xamada atensaun par atu lalais atu avansa obra ne’e, la’e afeta ita-nia komunidade sira iha ne’ebá,” dehan Ministru MOP, Salvador Pires, iha Palásiu Governu, Dili, kuarta ne’e.

Salvador Pires realsa, MOP sei halo avaliasaun bá kompañia Segerau Unipessoal Lda, bainhira lakoi hadi’a ponte ne’e, nune’e fó fali bá kompañia seluk ne’ebé iha kapasidade par ezekuta obra ne’e.

“Ida-ne’e depois ita sei haree, sira sei halo lai avaliasaun kona-ba ida-ne’e, tanba ne’e mak tenki haree kestaun legál husi kontratu téknikas, fó ona Diresaun Jerál Obras Públikas no mós señór Vise-Ministru,” subliña Ministru Salvador.

Projetu ponte ki’ik iha Ailok-Laran ne’e projetu emerjénsia ne’ebé nia prosesu aprovizionamentu loke iha Ministériu Finansas (MF) liuhosi Komisaun Nasionál Aprovizionamentu (CNA) no aprovadu husi Konsellu Administrasaun Fundus Infraestrutura (KAFI) ho plafon orsamentu $24.000 resin, ho prosesu konstrusaun hahù husi fulan-Setembru to’o fulan-Dezembru tinan 2021.

MOP liuhosi DNEPCC sei ejiji responsabilidade kompañia nian hodi finaliza lalais projetu ne’e hodi fasilita movimentasaun transporte iha área refere.

Tanba orsamentu rekonstrusaun estragus husi kalamidade (04-04-21) kolokadu iha fundus infraestrutura ne’e, nia prosesu tomak sei kontrola no administra husi KAFI.(ant)