Ro’o Tranship II Falha Atraka Iha Porto Dili, Pasejeirus Tun Deit Husi Dalan Alternativa

Smnewstl.com Media Online-Ro’o Tranship II, ne’ebe governo liu husi Ministerio Transporte no Telekomunikasaun Aluga husi Indonesia hodi subtitui Ro’o Berlin Nakroma ne’ebe avaria desde kedas fulan Dezembro 2020, falha atraka iha Porto Dili, Sabado semana ne’e.

Ro’o refere tula pasajeirus sai husi Regiaun Autonomo Oecusse Ambeno iha Sexta feira horseik oras tuku sanulu resin rua meudia.

Tuir orario Ro’o atraka iha Porto Dili oras dadersan, maibe la konsege tamba tuir informasaun kapasidade makina Ro’o kik no la augbenta infrenta laloran ho anin kompara ho Ro’o Berlin Nakroma no Sucess, maske kondisaun laloran ho anin ba loron ohin nian sei kategoria normal hela.

Situasaun ne’e halo pasajeirus sira paniku tebes tamba aliende infrenta hamlaha hasoru mos ho situasaun refere nune’e konsidera prejudika tebes sira.

“Ami sai horseik meudia husi Oecusse no foin mak to’o, maibe Ro’o la sandar iha nia fatin no mai sandar fali iha ne’e hodi halo ami tun mos araska tebes. Ami nia sasan hatun ladiak, tamba tau deit eskada kik maka tun no ne’e pregozu tebes,”hato’o Pasejeirus Agustino.

Nia hatutan, Ro’o nia fatin atraka iha parte karuk no los Porto nian,maibe wainhira atraka iha sorin ladiak, entaun koko mai atraka fali iha sorin, maibe la konsege no anin hu’u Ro’o mai atraka tia deit iha fatin ba Ro’o kargu nian.

Observasaun SMNewstl.com observa katak, situasaun ne’e konsege hamosu dezintendimentu entre parte tripulantes Ro’o ho pasajeirus, bainhira rona avizu katak, sira nia sasan labele foti no hein Ro’o atraka diak tia foin bele foti.

Pasajeirus sira sente lamentavel tamba aliende atraka tarde, halo sira mos sente pabiku tebes. Pasajeirus sira konsidera, situasaun nune’e nunka akontese ba Ro’o Berlin Nakroma no Sucess nune’e sira husu ba parte kompotente atu bele konsidera hodi la lori risku ba vida umana.

Ro’o Tranship II rasik aluga husi Indonesia ho total orcamentu kada fulan USD Rihun Atus Rua, Rua Nulu ($220).

Antes ne’e , Ro’o refere tula Primeiro Ministro Taur Matan Ruak desloka ba Atauro mos akontese situasaun hanesan nune’e hamosu reasaun makas husi parte reprezentante Povu iha Parlamentu inklui Sociedade Sivil.

Aliende ne’e, parte Komisaun Anti Komisaun mos detekta katak, kondisaun Ro’o teknikamente la viavel hodi halo operasaun, maske Ministro Transporte Telekomunikasaun nafatin mantein hodi autoriza halp operasaun.

Tuir informasaun matak, iha semana rua liu ba, Presidente Aportil hamutuk ho Diresaun Nacional Transporte Maritima asina ona karta ida hodi haruka ba Ministro Transporte Telekomunikasaun hodi esplika katak, teknikamente la viavel ona halo operasaun.

Maske nune’e, Ministro Transporte Telekomunikasaun nafatin insiste hodi autoriza Ro’o refere nafatin halo operasaun.

To’o informasaun ne’e fo sai, parte Ministro Transporte Telekomunikasaun seidauk aprezenta pozisaun. (Rio)