Smnewstl.com – Prezidente Autoridade Rejiaun Administrativa Espesiál Oecusse-Ambeno (RAEOA), Rogério Tiago Lobato entrega relatóriu irregularidade iha prosesu sosa Ró Haksolok no aviaun Zona Espesiál Ekonomia Sosiál Merkadu (ZEESM) bá Primeiru-Ministru (PM), Kay Rala Xanana Gusmão.
Rogério Lobato entrega relatóriu ne’e liu hosi enkontru ho Xefe Governu iha Palásiu Governu, sesta (19/07/2024).
“Ha’u mai hasoru-malu ho Primeiru-Ministru hodi ko’alia kona-bá situasaun iha Oecuse. Ha’u entrega mós relatóriu irregularidade kona-bá ró Haksolok no aviaun ZEESM. Relatóriu ne’e inklui kedan ona ho evidénsia ne’ebé hetan. Ida-ne’e bele ajuda auditoria internasionál ne’ebé sei halo,” Rogério Lobato hateten hafoin enkontru.
Konabá prosesu tuir-mai, Rogério Lobato dehan depende bá desizaun Primeiru-Ministru nian bazeia bá rekomendasaun hosi ekipa auditoria internasionál.
Antes ne’e liu hosi auditoria Tribunál Kontas deskobre katak, hosi tinan 2014 to’o 2018 Timor-Leste gasta millaun $24,5 bá konstrusaun ró Haksolok, maibé paradu tinan barak nia laran tanba falla iha desizaun ne’ebé foti iha fulan Agostu 2014 hodi ajudika direta bá empreza Atlantic Eagle ne’ebé bankarota ona no konsidera laiha transparánsia.
Líder másimu RAEOA ne’e mós preparadu atu bá hatán bainhira hetan notifikasaun hosi Ministériu Públiku (MP) ligadu ho polémika uma Estadu iha área Fulolo, aldeia Sanane, Suku Costa, Sub Rejiaun Pante Macasar. (*/Smnews)
Komentariu