Rogério Lobato Deklara Hamrik Iha Xanana Gusmão Nia Kotuk, Apoiu Kandidatu Troka Marí Alkatiri

Smnewstl.com 29-12-21 (Dili) — Eis Ministru Interiór, Rogério Tiago Lobato deklara, sei fó apoiu tomak bá eis Komandante Ein-xefe das FALINTIL, Kay Rala Xanana Gusmão, bainhira kandidata aan bá Prezidente Repúblika.

Rogério Tiago Lobato fila ona mai Timor-Leste, Kuarta-feira ne’e iha tuku 1 meudia ho aviaun Malindo husi Malázia, hafoin bá halo tratamentu saúde iha estrajeiru.

“Ha’u moras ha’u bá halo tratamentu iha li’ur foin mak to’o,” dehan Rogério Tiago Lobato, iha Aeroportu Internasionál prezidente Nicolau Lobato Comoro, Dili. Kuarta ne’e.

Rogério Lobato deklara, sei fó apoiu bá Líder Karismátiku, Kay Rala Xanana Gusmão, bainhira Xanana kandidata aan bá Prezidente Repúblika.

Maibé, Rogério Lobato afirma, nia parte seidauk bele deklara atu apoiu kandidatu ruma iha eleisaun prezidensiál tinan 2022.

“Maun Boot Xanana nia kandidatu ha’u apoiu nia, Xanana nia kandidatu ha’u apoiu nia, sé nia apoiu ema seluk ne’e oin seluk ona,” dehan nia.

Sorin seluk, kona-ba kongresu nasionál Partidu Fretilin, Rogério Lobato afirma, sei fó apoiu bá kandidatu ne’ebé atu troka lideransa atuál lideradu, Marí Alkatiri, nune’e hadia diak liután Partidu istóriku ne’e.

“Sertamente ha’u FRETILIN tanba saida ha’u labele partisipa, laiha pakote ha’u apoia ema sira-ne’ebé agora hakarak muda lideransa ne’e klaru,” dehan Rogério Lobato, iha Aeroportu Internasionál prezidente Nicolau Lobato Comoro, Dili, kuarta ne’e.

Rogério deklara tan katak, Sekretáriu Jerál Partidu FRETILIN, Marí Alkatiri lidera tinan 20 ona, tan ne’e tempu par atu deskansa ona, tanba katuas ona.

Nia hatutan, Marí Alkatiri lidera partidu FRETILIN la susesu, tanba lidera partidu FRETILIN tinan 20 ne’e, ka’er ukun ita governasaun tinan 4 de’it.

“La’e, nia hela iha ne’ebá 20 anos ona nia katuas ona to’o ona, agora ema seluk mak ka’er fali FRETILIN. Susesu iha saida.? Tinan 20 nia ukun tinan 4 de’it ne’e susesu iha ne’ebé,” tenik Rogério.

Entretantu, kona-ba keixa Marí Alkatiri bá Ministériu Públiku hasoru Rogério Tiago Lobato, Abílio Araújo ho nia Espoza, José Luís Guterres no seluk tan.

Rogério dezafia Marí Alkatiri atu responde bá nia kona-ba, rekuiñesimentu ne’ebé Marí Alkatiri fó bá Alarico Fernandes tinan 33 ne’e.

“Ha’u hakarak nia atu responde de’it mai ha’u dehan, nia fó rekuiñesimentu bá Alarico Fernandes 33 anos depois de traisaun Alarico Fernandes nian ne’e loos ga laloos,” sujere Rogério.

Entretantu, tuir observasaun Smnewstl.com nian iha Aeroportu Comoron, Rogério Lobato to’o iha Aeroportu simu direta husi família boot Lobato lideradu Luís Lobato, no tara kedas tais nu’udar símbolu Bem-vindo tuir tradisaun Timor.(ant)