Ró Avaria Hotu, UPM Patrulha Deit Iha Rai Maran

Smnewstl.com 06-10-2021 (Dili) – Ró patrullamentu husi Unidade Polísia Marítima (UPM) nian kuaze avaria hotu, no to’o agora seidauk halo manutensaun, nune’e difikulta sira labele halo patrullamentu iha tasi.

Komandante UPM, Superintendente Basílio de Jesus hateten, kuaze fulan 4 ona mak UPM labele halo patrullamentu iha tasi, tanba ró NRT Kay Rala ho ró Lusitânia inklui ró lansa ki’ik sira avaria hotu, tanba ne’e UPM deside fó apoiu seguransa fali iha rai maran hodi minimiza konflitu sira.

“Anteriórmente ita iha lansa ki’ik iha ne’e, ita iha ró boot tolu, ró ida doasaun husi governu Xina mak ró NRT Kay Rala, ró ida NRT Lusitânia sosa ho orsamentu estadu nian 2011, depois ita iha mós lansa ki’ik MB rua kondisaun ró Kay Rala, Lusitânia mós kondisaun aat,” dehan Superintendente Basílio de Jesus, iha nia servisu fatin Lecidere, Dili. Kinta ohin.

Ho situasuan ida-ne’e Basílio de Jesus afirma, hanesan obstaklu boot ida bá UPM atu kontrola atividade ilegál no mós movimentu ilegál sira iha zona kosteira Timor-Leste nian.

“Klaru kuandu ita-nia ró aat ita mínimu tebes, agora kuaze fulan hira ona, ró Kay Rala mós iha avaria ki’ik ida ita labele sai, ró Lusitânia mós iha avaria ki’ik ida ita labele sai fulan 3 ou fulan 4 ita labele halo movimentu bá tasi,” dehan Basílio.

Maske ró avaria, maibé UPM nafatin hala’o servisu hanesan polísia nian, liu-liu fó apoiu seguransa iha rai maran.

“Talves ema balun ko’alia, tanba sá Marítima halo fali check point iha terrestre, nusa la hala’o nia funsaun iha tasi.? Loos. Ami la hala’o funsaun iha tasi tanba ró aat hotu, sé ami la apoiu iha parte terrestre, entaun ami kal han toba de’it. Tanba ne’e mak sé ami-nia funsoens iha tasi ne’e la la’o ho di’ak, tanba ró aat, entaun ami tenki fó fali apoiu iha terrestre hodi minimiza aktus krime ne’ebé mak bele mosu iha terrestre,”

Maibé Superintendente Basílio de Jesus dehan, Komandu PNTL kontrata ona tékniku estranjeiru balun atu mai hadi’a ró sira-ne’e, maibé la konsege mai tanba, Timor-Leste aplika hela impozisaun serka sanitáriu ho konfinamentu obrigatóriu.

Entretantu, UPM iha ró boot rua hanesan, ró NRT Kay Rala ne’ebé doasaun husi Xina, ró NRT Lusitânia sosa ho orsamentu estadu, inklui mós ró lansa ki’ik balun, ró hirak ne’e maioria avaria hotu.(ant)