Rezultado Buska ba Ro’o Tranship II, KAK Suspeita Diretor Ida ho Inisial FDCC

Smnewstl.com (Dili) — Posibilidade Komisaun Anti Korrupsaun (KAK), detein Diretór Kabutajen Nasionál ho inisiál FDCC ligadu ho kazu aluga ró Tranship II Gresik hodi halo operasaun iha Timor-Leste.

Pontu Vokál bá Buska no Apreensaun KAK, Euclides Madeira hateten, buska iha domisiliária no apreensaun ne’e KAK halo bá Diresaun Kaputajen Nasionál ho mós APORTIL ne’e, bazeia bá mandatu husi Tribunál Distritál Dili (TDD) ho númeru NUC 0007/21-KAK.

Relasiona ho kazu ró Tranship II Gresik ne’ebé governu liu husi Ministériu Transporte Komunikasaun (MTK) ho APORTIL halo hodi kontratu ró refere mak halo operasaun iha Timor-Leste.

Iha buska no apreensaun ne’e, KAK konsege prende dokumentu esensiál lubuk ida hanesan, kontratu sira iha prosesu aprovizionamentu, pedidu pagamentu CPV husi APORTIL no mós ekipamentu servisu seluk hanesan telemóvel ne’ebé Diretór Kabutajen Nasionál uza.

“Dokumentu esensiál balun ne’ebé mak iha mak hanesan kontratu sira, prosesu kona-ba aprovizionamentu oinsá mak ró ne’e mai kontaktu sira, ita mós asegura hela komunikasoens sira liu-liu telefone no mós ita-nia ekipamentu servisu seluk ne’ebé mak Diretór Kabutajen Nasionál ne’e uza,” dehan Postu Vokál, Euclides Madeira bá jornalista hafoin remata buska no apreensaun iha edifísiu KAK Farol, Dili. Segunda (16/08/021).

Alem de ne’e, KAK mós sei husu tan mandadu husi tribunál distritál Dili atu autoriza loke dokumentu ne’ebé prende ona.

“Depois ita sei husu tan lisensa mandadu husi tribunál par bele loke dokumentu sira-ne’e par ita bele haree evidénsia sira iha laran par ita bele foti hodi fasilita ita-nia prosesu,” tenik Euclides.

KAK mós asegura ona Diretór Kabutajen Nasionál ho inisiál FDCC iha edifísiu KAK hanesan suspeitu hodi halo identifikasaun.

Husi identifikasaun ne’e mak iha indísius forte, maka KAK sei detein Diretór Kabutajen Nasionál, FDCC iha sela detensaun durante oras 72 hafoin submete bá tribunál hodi halo julgamentu primeiru interrogatóriu.

“Tuir prosesu normál ami sei halo identifikasaun bá nia (FDCC), depende bá progressu husi identifikasaun ida-ne’e, sé durante prosesu identifikasaun iha iha evidénsias mak forte, orsida ita halo detensaun bá nia durante 72 oras tuir prosesu ne’ebé iha, depois mak ita submete bá iha tribunál par atu bá iha primeiru interrogatóriu, diskulpa ami labele fó sai karik involve tan ema ruma, maibé depende bá prosesu identifikasaun ne’ebé halo, sé orsida mak ita identifika tan balun, tenki tuir nafatin prosesu sira hanesan ohin halo ne’e,” subliña nia.

Alem de ne’e, pontu Vokál ne’e afirma, KAK sei halo armonizasaun bá dokumentu sira-ne’e, no posibilidade aban lokraik bele submete ona bá prokuradór titulár bá prosesu nian.

“Orsida ekipa sira sei halo fila-fali armonizasaun bá dadus sira, tanba ohin iha fatin tolu kedas, ne’ebé kolega sira halo fali armonizasaun bá dokumentus sira-ne’e, tarde liu aban lokraik iha bele submete bá iha prokuradór titulár bá iha kazu ida-ne’e. Ita seidauk halo verifikasaun bá dokumentus sira halo ona pagamentu ga seidauk, maibé ohin dokumentus kona-ba pedidu pagamentu nian ita asegura tiha ona, depois ita haree husi dokumentu ne’e mak ita bele termina katak, ida-ne’e bele halo ona pagamentu ga seidauk bele ga hanusa,” hateten nia.

Iha parte APORTIL nian, KAK asegura mós dokumentu sira kona-ba pedidu pagamentu CPV.

“Iha APORTIL nian relasiona ho dokumentus balun ne’ebé mak kona-ba pagamentu sira bá ró ninian ne’ebé mak dadauk ne’e ita iha, inklui mós kontratu sira-ne’ebé mak ohin Prezidente APORTIL rasik mós fasilita, depois dokumentu sira-ne’e ita estuda ida-ne’ebé mak relevante ho ita-nia prosesu bele vale sai hanesan evidénsia, ida-ne’e mak ita asegura,” afirma nia.

Euclides Madeira reafirma, maske ró Tranship II Gresik fila ona bá Indonézia iha sesta semana kotuk, maibé sei la prejudika prosesu investigasaun KAK nian, tanba ró ne’e la’ós patrimóniu estadu Timor-Leste nian, maibé governu liu MTK aluga de’it hodi halo operasaun iha Timór.

Tuir observasaun jornalista Smnewstl nian, ekipa konjunta kompostu husi KAK ho PNTL liu husi Servisu Investigasaun Kriminál Nasionál (SIKN) prende ona dokumentu lubuk ida iha edifísiu Diresaun Kaputajen Nasionál iha Portu Dili.

Iha APORTIL nian, KAK mós foti dokumentu balun hanesan, pedidu aprovasaun extensaun kontratu no invoice ró substitutu Tranship II hamutuk folla 38, n°.85/APORTIL/VII/2021. No mós request payment 14/July/2021 (folla 79), inklui CPV 0440838/27-05-2021 (folla 69).

No ekipa konjunta mós bá foti tan dokumentu balun iha Diretór Kabutajen Nasionál, FDCC nia rezidénsia iha Aldeia Moris foun, suku komoro postu Dom Aleixo Munisípiu Dili.

Prosesu buska domisiliária no apreensaun ne’e hala’o hahú iha tuku 9 ho balun to’o tuku 11 ho balun oras Timor-Leste.

Antes ne’e, governu liu husi MTK kontrata ró Tranship II Gresik husi Indonézia durante fulan rua hahú iha loron 21 fulan-Maiu to’o loron 21 fulan-Jullu tinan 2021 hodi mantein konektividade entre Dili ba Oe-cusse no Dili Ataúro.

Nune’e, kada fulan governu selu ho osan hamutuk dólar rihun $ 220, no fulan rua ne’e ezekutivu selu ona orsamentu ho montante rihun $ 440.(ant)