Reuniaun Konselho Estadu-Konselho Superior Defesa e Seguransa Rekomenda Extensaun EE ba Dala 16

Smnewstl.com — Iha reuniaun konsellu estadu ho konsellu superiór defeza no seguransa ne’ebé lideradu Prezidente Repúblika (PR), Francisco Guterres Lú-olo hodi diskuti proposta governu nian ne’ebé husu atu extende tan Estadu Emerjénsia (EE) bá dala-16, nune’e bele kombate vírus Covid-19 no mós variante Delta iha Timor-Leste.

Nune’e, membru sira husi konsellu rua ne’e, konkorda ho proposta ezekutivu ne’e, no rekomenda bá Xefe Estadu, Francisco Guterres Lú-olo, atu hato’o pedidu bá Parlamentu Nasionál (PN) atu diskuti hodi extende tan Estadu Emerjénsia (EE) bá dala-16.

“Ohin reuniaun konsellu superiór defeza no seguransa, no mós konsellu estadu, sira rekomenda bá Prezidente (Repúblika) kona-ba pedidu governu nian atu hato’o bá Parlamentu Nasionál depois Parlamentu Nasionál atu diskuti hodi extende ou la extende estadu emerjénsia,” informa Xefe Kaza Sivíl Prezidénsia Repúblika, Francisco Maria de Vasconselhos, hafoin remata enkontru konsellu tua ne’e iha Palásiu Prezidensiál Aitarak-laran, Dili. Segunda (26/07/21).

Francisco Vasconselhos afirma, posibilidade ohin, Xefe Estadu, haruka kedas pedidu ne’e bá órgaun lejislativu, nune’e bele diskuti no aprovasaun bá pedidu renovasaun deklarasaun estadu emerjénsia bá dala-16 ne’e.

Nia hatutan, atu extende ka la extende estadu emerjénsia ne’e kabe bá kompeténsia Parlamentu Nasionál (PN) nian.

“Kontéudu ne’e husu bá Parlamentu, tanba Parlamentu mak deside, governu husu mai Prezidente Repúblika, ne’e tenki bá iha ne’ebá depois Parlamentu Nasionál mak deside extende ou la extende, tanba prezidente la deside, prezidente husu opiniaun, desizaun konsellu estadu ha’u labele divulga bá ita-boot sira,” subliña nia.

Vasconselhos realsa, enkontru ne’e, parte sira la ko’alia kona-ba medidas ezekusaun deklarasaun estadu emerjénsia, maibé ko’alia sobre oinsá atu prevene Covid-19 no variante Delta labele tama Timor-Leste.

“La’e tanba hanesan ida uluk nafatin, mak depois de haree katak, ita-nia viziñu dadus ne’ebé mak iha ne’ebá katak, Delta komesa sa’e iha munisípiu ga kabupaten tolu iha Indonézia mak agora makas. Tanba ne’e mak atu prevene ida-ne’e, atu husu bá Parlamentu Nasionál atu diskuti hodi extende ou la extende estadu emerjénsia,” subliña nia.

Entretantu, semana kotuk, Ministériu Saúde no Sala Situasaun Sentru Integradu Jestaun Krize (SIJK) anunsia ofisialmente bá públiku katak, Timor-Leste rejista ona kazu variante Delta na’in-4 ne’ebé viajen husi Indonézia mai Timor-Leste.

Pasiente Variante Delta na’in-4 ne’e, na’in-3 sidadaun Timoroan, no na’in ida sidadaun estrajeiru, sira na’in-3 mak kumpre hela izolamentu, enkuantu na’in ida rezultadu hatudu negativu ona.(ant