Smnewstl.com 17-01-2022 (Dili) — Padre Dispensadu Martinho Gusmão ofisialmente deklara Tersa-feira ne’e bá públiku ninia kandidatura hodi kompete bá Prezidente Repúblika (PR) periódu 2022-2027. Iha okaziaun ne’e, Martinho Gusmão afirma, la hetan bensaun ka tula liman husi partidu polítiku sira, maibé hetan bensaun husi Santu Padre Papa Francisco ho Amu Bispu sira.
Tuir Padre Dispensadu ne’e katak, desizaun kandidata a’an ho karakter inkluzaun, tanba Xefe Estadu, Francisco Guterres Lú-olo dekreta ona data eleisaun prezidensiál bá loron 19 fulan Marsu 2022.
“Ha’u Martinho Germano da Silva Gusmão nu’udar sidadaun orijinária, ohin deklara ofisialmente no publikamente nu’udar kandidatu ho karakter inkluzaun,” dehan Kandidatu Martinho Gusmão, iha komferénsia imprensa ne’ebé hala’o iha nia rezidénsia Metiaut, Dili.
Kandidatu Martinho Gusmão esplika, rajaun nia kandidatu nu’udar Inkluzaun, tanba durante ne’e nia laiha partidu, maibé moris hanesan sidadaun baibain, maibé mós la’ós ema independente.
Maibé, sente onradu, tanba ninia kandidatura ne’e, hetan bensaun husi Papa Francisco hamutuk ho Amu Bispu no na’i lulik sira.
“Ha’u sente katak, Santu Padre tula liman ona, Bispu sira tula liman ona di’ak ona, karta husi Santu Padre Amu Papa rasik, la’ós suporta nia haruka halo kampaña atu hili ha’u la’e, mais ha’u dehan, ida-ne’e suporta morál no suporta espirituál husi Santu Padre rasik husi Kardeal Luis António Tagle,” dehan nia.
Martinho Gusmão agradese bá Partidu PUDD, tanba maske partidu ki’ik, maibé iha korajen nafatin atu lori prosesu ne’e bá oin.
“Ha’u hakarak agradese mós bá PUDD, partidu ki’ik ida-ne’ebé korajen teb-tebes no laran metin teb-tebes husi kbiit oituan ne’ebé iha, ita koko atu lori prosesu ne’e bá oin, partidu ne’ebé seidauk komete erru iha nasaun ida-ne’e nia laran, partidu ne’ebé harii husi ki’ak no susar, maibé korajojamente forsadamente atu lori prosesu mudansa iha ita-nia estadu,” dehan nia.
Nia mós agradese bá Partidu CNRT ho nia Prezidente, Kay Rala Xanana Gusmão ne’ebé konvida nia bá iha loron 13 fulan Outubru 2021 iha Mehara Munisípiu Lautém, iha loron ne’e mak nia deside aan atu kandidatu bá Prezidente Repúblika.
Maibé nia klarifika, ninia kandidatura ne’e, la’ós tula liman husi Líder Karismátiku, Kay Rala Xanana Gusmão, tanba nia rasik mós seidauk husu ema ida atu tula liman bá nia.
Tanba ne’e, tempu badak, Kandidatu Martinho Gusmão sei bá rejista iha Tribunál Rekursu ho apoiante rihun 5 resin tuir kritériu no lei eleisaun prezidensiál nian.(ant)
Komentariu