Iha Kribas Manatuto, Rai Nakdoko Hodi Kalan Rezulta Silvano da Costa Lakon Vida

Smnewstl.com 04-02-2022 (Dili) — Diretór Jerál Protesaun Sivíl, Superintendente, Ismael Babo hateten, udan no anin boot ne’ebé akontese akompaña ho rai nakdoko ho Magnitude 4.9 iha Kinta-feira, (03-02-2022) hodi kalan rezulta joven ida ho naran Silvano Carlos tinan 34 lakon vida.

Ismel Babo esplika, fenoman natural ne’e akontese iha Kribas, Municipio Manatuto. Tuir nia, joven refere halo hela movimentu iha estrada nune’e wainhira akontese rai nakdoko derepenti rezulta rai halai akompanha ho fatuk monu hodi halakon nia vida.

“Hodi kalan udan anin, inklui rai nakdoko iha ita nia territóriu, iha parte Same ninia, ho nia magnitutu 4.9 no rai halai hanehan ita-nia joven ida ho identidade Silvano Carlos Alves (24) iha kribas Munisípiu Manatuto,” tenik Superintendente Ismael ba jornalista, iha Kaikoli, Sesta-feira ne’e.

“Ekipa SEPS aproxima kedas ho autóridade lokál liuliu Ministeriu solidaridade sosial inkluzaun hodi fo ona apoio emerjénsia ba sira ne’ebé lakon vida,” dehan nia.

Aleinde ne’e mós, iha semana ida ne’e laran, SEPS rejísta akontesimentu dezastre naturál hamutuk 10, inklui sidadaun na’in-rua lakon vida, inklui rai hanehan iha Kribas Munisípiu Manatutu.

Tanba ne’e, Ismael Babo apela ba komunidade sira ne’ebé mak halo viajen bá Munisípiu no mai Dili, atu la’o ho kuidadu, tanba tempu udan sempre mosu rai halai no rai namdoras, inklui ai tohar.(ant)