Smnewstl.com — Prezidente Repúblika,José Ramos-Horta haruka ona asisténsia imediata no kompromete no garante atu harii uma dignu ida ba Avó Maria da Costa ho idade 63, ne’ebé durante dékada ida nia laran hela mesak iha fatuk-kuak ida iha área Badunau, Aldeia Lulihene, Suku Bucoli, Munisípiu Baucau.
Unidade Servisu Sosiedade Sivíl no Asuntu Sosiál (SSSAS) husi Prezidensiál Repúblika nian, hala’o viajen ba fatin refereiha loron 23 fulan-Jullu hodi avalia diretamente kondisaun moris avó Maria nian. Hahú kedas iha tinan 2015, hafoin nia laen no nia maun ne’ebé maka fornese rai ne’e ba nia mate, avó Maria moris iha kondisaun ne’ebé prekária tebes, hela iha fatuk ku’ak ida ho de’it luan metro rua.
Avó Maria ko’alia iha nia lian-maten, uai-mua, nia esplika katak nia hakarak hela mesak hodi la fó todan ba família sira seluk, no hetan ajuda husi vizinhu sira ne’ebé tulun nia de’it iha tempu balun ho ai-han no sasaan necessidade bázika.
Iha resposta, Xefe Estadu haruka ona apoiu emerjénsia ne’ebé inklui mantimentu, sasaan necessidade bázika no ajuda osan hodi hatán ba nesesidade urjente sira. Prezidénsia deklara mós katak iha tempu badak, sei harii hela-fatin ida ho dignu ne’ebé bele fó seguransa no dignidade ba Avó Maria, hodi bele proteje nia husi problema sira ne’ebé nia hasoru durante tinan sira barak nia laran.
Asaun ida ne’e hatudu kompromisu forte husi Prezidente Repúblika atu garante katak labele husik ba kotuk sidadaun ida, espesiál liu sira ne’ebé moris iha kondisaun sira ne’ebé vulneravel no idozu sira(*/Smnews)
Komentariu