Prezidente Repúblika Promulga Transformasaun Diresaun Jerál Estatístika Sai Institutu Nasionál Estatístika Timor-Leste

Smnewstl.com-Palásiu Prezidensiál, 01 Marsu 2023, Prezidente Repúblika, José Ramós-Horta, promulga ona Dekretu-Lei númeru 4/2023, 15 Fevereiru kona-ba transformasaun husi Diresaun Jerál Estatístika – DJE sai Institutu Nasionál Estatístika Timor-Leste – INETL, I.P.

Dekretu lei ne’ebé publika ona iha Jonal Repúblika iha loron 15 fulan Fevereiru, ho objetivu atu atu hasa’e kapasidade jestaun no autonomia instituisaun ne’e hodi hadi’a kualidade, imparsialidade no konfiansa ba iha estatístika ofisiál Estadu nian.

Diploma ne’e aliña ho Polítika Reforma Jestaun Finansas Públikas ne’ebé mak inísia ona dezde tinan 2015 no governu ne’ebé aposta mos ba fortalesimentu instituisaun estadu, liu-liu iha organizmu ne’ebé konvertidu ona ba Institutu Públiku.

INETL, I.P. iha papel atu rekolla, análize no halo produsaun estatístika ofisiál nasionál inklui Sensu no Konta Nasionál no mós sei relata informasaun, relatóriu inklui klarifikasaun ruma konaba estatístika ofisiál ba públiku.

Servisu estatístiku hahu ho aprovasaun Dekretu-Lei númeru 17/2003, 1 Outubru kona-ba Estatístika, primeiru husi Diresaun Nasionál Estatístika, hafoin mud aba Diresaun Jerál Estatístika no agora sai ona institutu públiku.(Smnews)