Smnewstl.com – Prezidente Índia, Smt. Droupadi Murmu hala’o vizita ofisiál mai Timor-Leste (TL), hasoru-malu ho Primeiru-Ministru (PM), Kay Rala Xanana Gusmão ho membru IX Governu Konstitusionál no asina akordu tolu.
Akordu tolu ne’e, da-huluk kona-bá Izensaun Obrigasaun Vistu bá Pasaporte Titulares Diplomátiku no Ofisiál ne’ebé asina hosi Ministru Negósiu Estranjeiru no Kooperasaun Timor-Leste, Bendito dos Santos Freitas ho Embaixadór Extraordináriu no Plenipotensiáriu Repúblika Índia, Sandeep Chakravorty.
Da-ruak Memorandu Entendimentu kona-bá Programa Interkâmbiu Kulturál entre Governu Repúblika Demokrátika Timor-Leste ho Governu Repúblika Índia bá tinan 2024-2028, ne’ebé assina hosi Sekretáriu Estadu Arte no Kultura, Jorge Soares Cristovão ho Embaixadór Extraordináriu no Plenipotensiáriu Repúblika Índia, Sandeep Chakravorty.
Da-toluk maka, Memorandu Entendimentu bá Kooperasaun no Kolaborasaun kona-bá Radiodifuzaun entre Rádiu no Televizaun Timor-Leste (RTTL) ho Prasar Bharati, Índia (Broadcasting Corporation of India) asina hosi Embaixadór Extraordináriu no Plenipotensiáriu Repúblika Índia, Sandeep Chakravorty ho Prezidente Konsellu Administrasaun RTTL, José António Belo “TARALEU”.
Durante enkontru ne’e mós Primeiru-Ministru, Xanana Gusmão agradese bá Índia oan sira ne’ebé apoia Timor-Leste (TL) durante tempu rezisténsia no hafoin ukun-an.
Antes ne’e Timor-Leste estabelese ona kooperasaun iha área estratéjiku sira mak hanesan, edukasaun, saúde, agrikultura no seluk tán.
Vizita ofisiál iha sábadu 10 Agostu 2024 ne’e, hanesan vizita dahuluk Xefe Estadu Índia nian mai TL no vizita ida-ne’e hanesan parte ida hosi ajenda vizita Prezidente Índia iha rejiaun pasífiku inklui nasaun Fiji ho Nova Zelándia.
Durante enkontru ASEAN-India ne’ebé hala’o iha ámbitu simeira ASEAN bá dala-43 iha Setembru tinan kotuk, Primeiru-Ministru Índia Narendra Modi anunsia desizaun atu estabelese embaixada Índia iha Díli.
Deklarasaun ofisiál ne’ebé publika iha pájina ofisiál Ministériu Negósiu Estranjeiru Índia hateten katak, Desizaun ne’e refleta importánsia hosi relasaun amizade entre Índia-ASEAN ho Timor-Leste. (*/Smnews)
Komentariu