Smnewstl.com — Prezidénsia Repúblika hamutuk ho ekipa Konjunta Téknika, inklui reprezentante husi Ministériu Defeza no Ministériu das Obras Públicas (MOP) halo observasaun ba Rezidénsia eis Prezidente Repúblika dahuluk RDTL no proklamadór, Saudozu Francisco Xavier do Amaral nian, ne’ebé estadu rekonstrui iha Suku Kaemauk-Turiscai.
Ba tinan ida ne’e, atu komemora 50-Anos loron FALINTIL nian, xefe Estadu Horta, inisia sei halo vizita ofisiál ida ba Binani, Turiscai. Observasaun ne’e parte husi preparasaun kona-ba rehabilitasaun uma patrimóniu estadu no nia potensiál atu uza hanesan akomodasaun ba líderansa nasionál sira, antes sei ba to’o fatin seremoniál.
Rezidénsia refere hari’i iha mandatu Prezidente Ramos-Horta nian iha tinan 2011 liu ba. Agora dadaun rezidénsia ne’e hanesan patrimóniu Estadu, iha momentu ne’e mos Saudozu Francisco Xavier uza ona ba dekansa dala ida iha ne’eba hafoin hetan moras iha Dili to’o la fila. Antes ne’e mós Líder nasionál sira hanesan Eis-Prezidente Repúblika no atual Primeiru Ministru Kayrala Xanana Gusmāo no Eis Prezidente no PM Taur Matan Ruak uza ona ba deskansa, durante sira nia vizita ba Turiscai, Manu- Fahi.
Iha tempu besik Estadu hamutuk ho Entidade relevante halo reabilitasaun fali. Hodi prepara hanesan akomodasaun ba Xefe Estadu no mos bainaka importante sira. Prezidente Repúblika J. Ramos-Horta hamutuk ho Bainaka sira, sei uza rezidénsia ne’e hanesan fatin deskansa antes ba fatin prinsipal Komemorasaun iha Binani.
Tuir mai, ekipa mos halo avaliasaun teknikál iha fatin husi Turiscai ba to’o Mindeli Binani, hodi fasilita preparasaun logístika no infrastrutura ba loron importante ne’e no fó valorizasaun bo’ot ba kontribuisaun FALINTIL nian iha istória libertasaun Pátria Timor-Leste.
Eventu Komemorasaun iha Binani ne’e, hadi fó oportunidade ba jerasaun foun atu aprende husi valór sagradu luta nain sira nian no fó respeitu ba líder sira ne’ebé fó-an ba libertasaun Nasionál (*/Smnews)
Komentariu