Prezidénsia Repúblika Apoiu Nesessidade Bázika Ba Komunidade Wadaboru Ne’ebé Ke’e Rasik Estrada

Smnewstl.com– Baucau, 09 Marsu 2023 Prezidénsia Repúblika, liu husi servisu sosiedade sivíl no assuntu sosiál, kinta-feira ne’e, lori ai-han nesessidade bázika ba komunidade aldeia wadaboru suku Gurça, postu administrativu Quelecai munisípiu Baucau ho inisiativa ke’e rasik estrada kilométru 3 ba sira-nia aldeia.

Nesessidade bázika ne’ebé apoiu ba komunidade aldeia tolu iha suku Gurça mak hanesan, aldeia wadaboru, sa’ebere no saewa mak hanesan fo’os, mina, supermi no seluk tan.

“Ha’u observa direta iha baze, komunidade ne’ebé koopera malu servisu iha grupu, hodi ida-ne’e mak ha’u halo proposta ba assessor sosiedade sivíl assuntu sosiais, ho ida-ne’e mak ekipa husi gabinete prezidente bele lori sasán to’o mai iha komunidade ne’ebé oferese aan loke estrada ba sira-nia aldeia,” hateten, Reprezentante servisu apoiu sosiedade sivíl Prezidénsia Repúblika, Domingos Sávio Freitas.

Sorin seluk Xefe Aldeia Wadaboru Suku Gurça Postu Quelecia Muníspiu Baucau, José Fonseca, agradese ba Xefe Estadu, tanba bele fó ona apoiu hanesan nesessidade bázika ba nia komunidade ho voluntariamente ke’e no loke rasik estrada ba sira-nia aldeia desde loron 2 marsu to’o 31 abríl 2021 kilométru 3 resin.

“Ami agtadese ba na’i Prezidente ne’ebé konsidera ami povu wadaboru bele apoiu ai-han ba ami povu wadaboru, maibé, hakarak hato’o ba media, ami-nia estrada wadaboru, ami hahú ke’e voluntariamente iha dia 2 marsu 2021,” hatete Xefe Aldeia ne’e.

Autoridade lokál ne’e haktuir, to’o iha loron 13 marsu 2022, maka sira hetan apoiu Programa Nasionál Dezenvolvimentu Suku (PNDS) suku Gurça nian, inklui obras públika munisípiu Baucau mós apoiu ekipamentu pezadus balun hodi loke dalan refere.

“Presiza duni (loke estrada), tanba área ne’ebá ne’e ami-nia produtu lokal barak, maibé, susar ami atu asesu ba merkadu, tanba ne’e mak ami hola inisiativa, momentu ne’ebá ami kontribui osan rihun $ 3 resin mak loke Estrada,” tenik nia.(smnews)