Presiza Lei Komplementar 18 Hodi Emite Sertifikadu Rai Bá Komunidade

Smnewstl.com 01-10-2021 (Dili) – Sekretáriu Estadu Terras Propriedades (SETP), Mário Ximenes hateten, SETP to’o oras ne’e, seidauk bele fó sertifikadu rai bá populasaun ne’ebé sira-nia rai identifikadu ona, tanba sei presiza tan lei komplementar 18.

Sekrertáriu Estadu SETP, Mário Ximenes dehan, tuir kontratu ne’ebé governu halo ho parte Servisu Nasionál Kadastrais (SNC) rejista parselas rai hamutuk rihun 310, maibé SNC rejista ona hamutuk rihun 318 parselas.

Husi rihun 318 ne’e, iha rihun 42 mak sei iha dispuras entre komunidade ho komunidade, no mós komunidade ho estadu.

“SNC rejista ona tuir tárjetu ne’ebé mak ita kontratu ho SNC 310 mill parselas rejistradus, maibé ho servisu SNC nian sira rejistu liu tiha ona 318 mill, husi 318 mill ne’e 42 mill mak kategoria iha disputa entre privadu ho privadu entre privadu ho estadu disputa,” dehan Sekretáriu Estadu SETP, Mário Ximenes, iha ministériu finansas, sesta ohin.

Alem de ne’e, husi rihun 42 ne’ebé disputas, SETP bainhira estabelese ona komisaun terras propriedades maka sei haree no foti desizaun, nune’e bele rekomenda bá SETP hodi fó sertifikadu rai.

“42 mill ne’e mak ita sei hein hela bainhira estabelesimentu komisaun terras mak iha kompeténsia atu deside, deside loos ona fó rekomendasoens ou desizoens husi komisaun terras envia terras no propriedades hodi emite sertifikadu, maibé sertifikadu até adata ita seidauk bele atribui ho rajoens, tanba ita sei presiza lei komplementár kuaze 18 mak seidauk kompletu,” esplika nia.

Maske nune’e Governante ne’e subliña, tuir loloos lei komplementár 18 ne’e, aprovadu ona iha tinan kotuk, maibé la konsege tanba kauza husi implementasaun serka sanitaria no konfinamentu obrigatóriu, tanba ne’e difikulta tékniku sira atu halo peskiza no análize.

Tanba Sekretáriu Estadu, Mário Ximenes hatutan, atu implementa lei no.13/2017 ne’e, sei presiza tan lei komplementár 18, nune’e bele garante direitu ita-nia sidadaun sira-nian.(ant)