PR Tulun Família Vulnerál No Vítima Dezastre Naturál Iha Ermera No Liquiça

Smnewstl.com Liquiça, 08 Marsu 2023-Prezidénsia Repúblika tulun idozu na’in rua ne’ebé ai-hun ida monu estraga sira nia rezidénsia no vítima na’in rua mos hetan kanek, iha Domingu foin lalais ne’e, (05/03) iha suku Leorema, Postu Administrativu Bazartete, Munisípiu Liquiça.

“Anin bo’ot iha kalan tuku ida, ami toba hela derrepente ai tarutu, fanu nia (kaben) dehan hader, atu halai mos la biban ona. Iha kalan bo’ot tuku ida, sasan uma laran la uza hotu” haktuir vítima Eugénio dos Santos.

Ekipa Prezidénsia Repúblika, lidera husi Asessór Servisu Sosiedade Sivil ba Assuntu Sosiais, Quintiliano Moniz mobiliza nesesidade bázika no material dapur nian, hodi tulun sidadaun ne’ebé afetadu husi dezastre naturais.

“Ohin ita hakat liu mai Suku Leorema, hodi apoiu nesesidade bázika ruma no mos família ida iha Leorema ne’ebé hetan dezastre  iha Domingu, ai baku sira nia uma, agradese ba professor sira, autoridade lokal ne’ebe halo kontaktu  no tau iha Facebook” hateten Quintiliano Moniz.

Xefe Suku Leorema, Sandra de Araújo haktuir, vítima sira hetan ona apoiu husi governu no dadus kona-ba estragus mós aprezenta ona Autoridade Protesaun Sivíl.

“Akontesimentu ne’e perigu tebes ba maluk ne’e nia vida, maibe agradese tanba sira na’in rua salva,  iha momentu ne’eba halo kedas ligasaun ho protesaun sivil, atu nune’e bele to’o direta iha fatin no  lori mos apoiu emerjensia ruma ba sira na’in rua, ami kontaktu malu kedas,  lori kedas vitima  sira bá hospital hodi kura vitima sira, lori kedas sira sa’e mai atu sira hela ho seguru, tanba vitima ira ne’e família vulnerável” hateten Xefe Suku Leorema.

Hafoin fahe sasan iha Leorema, Ekipa Prezidénsia Repúblika desloka ba Suku Tali Moro, Postu Administrativu Gleno, Munisípiu Ermera, hodi fahe kadeira roda ba portadór difisiénsia fízika na’in tolu, ne’ebé presiza tebes fasilidade ne’e no apoiu mós nesesidade bázika ba sira.

Iha suku Tali Moro, ekipa ne’e mos apoia família oan-ki’ak ne’ebé inan-aman mate ona no família ne’e hasoru difikuldade bo’ot iha família laran.

Família ne’e iha maun-alin na’in sia, na’in lima forma ona família, maibé na’in hat seluk, dependente ba sira ne’ebé forma ona uma-kain.

“Preokupasaun mak, tanba mesak, sai hanesan aman no inan ba alin sira, ekomomia familia,  limitadu tebes, ba alin sira nia presiza ba eskola nian, neseidade lor-loron ninia, liu-liu nesidade kiik-oan, kadernu lapis, sira ne’e susar tebes. durante ne’e, maun-bin ne’ebe buka servisu mak tau-matan , maibé maun forma ona familia, tulun tuir nia kbi’it,” Haktuir joven Jeferino dos Santos Babo, ne’ebé graduadu iha UNTL, maibé dezempregu hela no tau-matan ba nia alin sira.

Além de ne’e, uma ne’ebé sira hela dezde tinan 2000, ne’e propriedade estadu nian no iha kondisaun mukit teb-tebes.

Antes ne’e, Jeferino dos Santos Babo hanesan professor voluntáriu iha Rejiaun Autónoma Oecusse, maibé deside para, hodi tau-matan ba nia oan sira, tanba nia inan mate.

Joven ne’e hanoin, atu buka servisu iha Díli, maibé laran susar tanba la iha ema ida mak tau-matan ba nia alin sira no karik muda mai Díli, susar atu hetan família ne’ebé akomoda sira.

Benefisiáriu sira, husu atu Prezidénsia Repúblika kontinua tulun sidadaun ne’ebé presiza no Asessór Servisu Sosiedade Sivil ba Assuntu Sosiais tenik atu kontinua tulun sidadaun sira.

 “Ami simu pedidu barak, kona-ba familia kbiit laek, familia balun difisiénsia, balun oan-ki’ak  balun mos dezastrers naturasi, balun mos  hetan inséndiu, ida ne’e ami hato’o ba Señor Prezidente, hare no iha tinan ida ne’e, Señor Prezidente hateten katak, prioridade liu mak apoiu ba kbiit laek sira, bazeia ba pedidu husi autoridade ka grupu joven sira,” Konklui Quintiliano Moniz.(smnewsl)