PR Lú Olo Veta Estatutu Majistradu Judisiál

Smnewstl.com 15-12-21 (Dili) — Prezidente Repúblika (PR), Francisco Guterres Lú-olo, veta dekretu Parlamentu Nasionál (PN) kona-ba estatutu majistradu judisiál.

Komunikadu imprensa ne’e Smnewstl asesu husi média PR, Kuarta-Feira ne’e dehan, tuir Konstituisaun RDTL, Prezidente Repúblika iha kbiit atu promulga ka veta Dekretu ne’ebé Parlamentu Nasionál aprova iha ninia sesaun Plenária ka Dekretu-Lei ne’ebé Governu aprova liuhusi Konsellu Ministrus.

Iha loron 16 novembru liubá, Parlamentu Nasionál haruka mai Prezidente Repúblika Dekretu ida kona-ba Estatutu Majistratura Judisiais.

Hafoin tetu kle’an dekretu ne’e, Prezidente deside veta no haruka fila diploma ne’e ba Parlamentu Nasionál, tuir artigo 88.o n.o 1 Konstituisaun Repúblika.

Liuhusi mensájen haruka ba Parlamentu Nasionál, Prezidente Repúblika husu ba deputadu sira atu hadi’ak Dekretu ne’e iha mós ámbitu Lei kona-ba Organizasaun Judisiária. Lei ida-ne’e promulga ona husi Prezidente Repúblika no publika ona iha Jornal Repúblika, iha 2 dezembru 2021.

Tuir lei organizasaun judisiária, juíz sira iha Tribunal Administrativu, Fiskál no Kontas haktuir Estatutu Majistratura Judisiais no haktuir mós jurisdisaun husi Konsellu Superior Majistratura Judisiál.

Dekretu kona-ba Estatutu Majistradu Judisiál sira tenke haktuir regra sira tama ona iha Lei Organizasaun Judisiária. Iha mensájen haruka ba Parlamentu Nasional, iha 10 dezembru 2021, Prezidente Repúblika fó-hatene mós fundamentu sira seluk relasiona ho ninia desizaun veta Dekretu kona-ba Estatutu Majistradus Judisiais.

Parlamentu Nasional sei tetu fundamentu hothotu hato’o husi Prezidente Repúblika iha sesaun Plenária iha loron sia nulu nia laran (90 dias), hahú sura husi loron ne’ebé órgaun soberania ne’e simu dekretu ne’e ho mensájen prezidensiál kona-ba veto.

Parlamentu Nasionál bele hili dalan tolu:

1. Bele halo konfirmasaun ba votu ho deputadu, mínimu na’in 33. Ho votu a favor husi maioria absoluta ne’e, Parlamentu Nasionál bele haruka filafali ba Prezidente Repúblika hodi promulga Dekretu ne’e iha prazu loron ualo nia laran, tuir artigu 88.on.o 2 Konstituisaun Repúblika;

2. Bele halo expurgasaun ka alterasaun ba Dekretu ne’e tuir fundamentu sira ne’ebé Prezidente Repúblika hato’o liuhusi nia mensájen;

3. Parlamentu Nasionál la halo reuniaun to’o prazu loron 90 ramata. Se Parlamentu Nasional hili dalan ida ne’e, Dekretu ne’e kaduka /mate.(*/ant)