PR Lú-olo: Idul Adha Fó Sentidu Boot Bá Komunidade Musulmanu Hodi Hasa’e Sakrifísiu Bá Allah

Smnewstl.com — Prezidente Repúblika, Francisco Guterres Lú-olo hateten, selebrasaun idul adha atu fó sentidu bá komunidade muslumanu sira-ne’ebé halo sakrifísiu boot hodi hasa’e fi’ar bá maromak (allah) iha Timor-Leste no mundu tomak.

Mensajen Xefe Estadu nian ne’e, transmite husi Xefe Kaza Sivíl Prezidénsia Repúblika, Francisco Maria de Conselhos, iha Masjid Annur kampu alor, Tersa (20/07/021).

“Idul adha fó sentidu boot tebes bá komunidade muslumanu iha Timor-Leste no iha mundu oinsá halo sakrifísiu no momentu ida ne’ebé hasa’e ita-boot sira-nia fi’ar bá allah hodi hametin relasaun entre ema bá ema no hasa’e kualidade moris liu husi asaun sosiál,” dehan mensajen PR Lú-olo.

Xefe Kaza Sivíl hatutan, sakrifísiu ne’ebé komunidade muslumanu halo iha loron importante ne’e mak liu husi animál bibi no karau hodi fahe bá maluk sira-ne’ebé presiza, liu-liu bá sira-ne’ebé susar hetan ai-han iha lor-loron nian, tanba atu ida-ne’e hasa’e liután komunidade muslumanu sira-nia asaun konkreta hodi hakat bá dalan moris foun nian mai ho valór fi’ar bá relijiaun unidade, fraternidade no sentidu solidariedade.

“Nune’e, ha’u aproveita oportunidade ida-ne’e atu hasa’e liután valór hirak ne’ebé komunidade muslumanu ka’er metin iha selebrasaun ida-ne’e solidariedade, jenerozidade no karidade bá ita-nia kompatriota vulnerável sira. Valór sira-ne’e boot no aas tebes bá koezaun nasionál no sosiál, tanba lori ita Timoroan sai ema ida de’it no povu ida de’it,” tenik nia.

Xefe Estadu mós fó sasin bá timoroan hotu nia espíritu toleránsia iha rejiaun hotu-hotu ne’ebé hatur ona iha konstituisaun Repúblika Demokrátika Timor-Leste (RDTL).

Xefe Estadu mós fi’ar katak, sei hasa’e nafatin valores ho haklaken beibeik espíritu toleránsia konvinénsia relijiaun iha Timor-Leste.

“Nu’udar Prezidente Repúblika, ha’u sei tane aas nafatin valór sira-ne’e hamutuk ho ita-boot sira no komunidade relijioza seluk, ita hotu fó liman bá malu nafatin nu’udar povu ida de’it hodi serbí ita-nia rain doben Timor-Leste,” afirma Lú-olo.(ant)