PR Horta Rona Esperiénsia Dezenvolvimentu Husi Ministro MATK UEA

Smnewstl.com – Prezidente Repúlika, José Ramos-Horta konsidera enkontru ho Ministru Assuntu Toleránsia no Koezisténsia (MATK) hosi Uniaun Emiratus Árabe (UEA), Nahyan bin Mubarak Al Nahyan, nu’udár enkontru amizade hodi rona opiniaun no esperénsia sira kona-ba prosesu dezenvolvimentu no unidade Governu Federál UEA ne’ebé forte tebes to’o ohin-loron.

Xefe Estadu mós esplika katak UEA loke-an ba mundu hodi hetan investór atu hamutuk ho Governu bele dezenvolve liu tan Emiradus ho di’ák.

Maibé presiza mós traballadór hosi rai-seluk nune’e UEA deside hodi harii mós MATK ho objetivu atu oinsá kontrola ema hotu nune’e bele simu ema hosi rai-seluk hodi bele servisu ho matenek no hetan respeitu iha UEA liu-liu iha Abu Dhabi.

Tuir Prezidente Horta, liu hosi vizita ne’e, hahú loke dadaun ona odamatan hosi UEA nian atu mobiliza investór hodi investe iha Timor-Leste nune’e bele loke liutan empregu maibé Xefe Estadu Timor-Leste ne’e salienta ‘’depende ba preparasaun Governu nian atu simu investór.’’

Iha enkontru ne’ebé hala’o iha sidade Abu Dhabi, loron 17 Outubru 2023 ne’e, hetan mos partisipasaun hosi membru diplomata UEA iha estranjeiru inklui Prezidente Konsellu Parlamentu Federál UEA.

Hafoin enkontru, Xefe Estadu ho delegasaun inklui Vise-Ministra Negósiu Estranjeiru ba Asuntu ASEAN, Milena Rangel, kontinua vizita Muzeum Abrahamic Family House no Louvre Abu Dhabi hodi vizita koleksaun sira inklui Kapela Katólika, meskita, mosteiru budista, nu’udár simbolu toleránsia reliziaun iha mundu hodi harii fraternidade umana.

Ho vizita muzeu ne’e, Xefe Estadu Horta termina nia vizita ofisiál iha Abu Dhabi (EUA), ne’ebé hahú iha loron 12 to’o l8 fulan ne’e, no sei kontinua hikas vizita ofisiál iha Arabia Saudita. (Smnews)