Smnewstl.com-Dili –Prezidente Repúblika, José Ramos-Horta, re-lembra hikas hala’o enkontru bilateral Ministru Adjuntu Relasaun Externa Repúblika Populár Xína, Nong Rong, hodi estabelese relasaun bilateral entre Xina ho Timor Leste.
Hafoin enkontru ho Xefe Estadu, Ministru Adjuntu Relasaun Externa Repúblika Populár Xína, Nong Rong informa, mós transmite komprimentus husi Prezidente Xína, Xing Jimping bá Xefe Estadu, Ramos-Horta.
“Prezidente Repúblika Horta mós fó sai kona-ba relasaun no belun ho Xina iha tempu naruk. Prezidente Horta vizita Xina iha 1976. Xefe Estadu Horta halo sumáriu ida no hato’o espetasaun ba relasaun nasaun rua, partikularmente ba dezenvolvimentu bilaterál entre Timor Leste ho Xina, desde indepedénsia Timor-Leste,” hatete Ministru Adjuntu Relasaun Externa Repúblika Populár Xína, Nong Rong, iha Palásiu Prezidensiál.
Governante ne’e haktuir, sente kontente haree atinjimentu husi dezenvolvimentu boot Timor-Leste nian durante tinan 20 nia laran. No satisfeita ho relasaun entre nasaun rua ne’e.
“Ami mós orgullu, ami bele fó asisténsia tuir saida mak ami bele ba maun no alin sira iha Timor-Leste. Edifísiu ida ne’ebé agora ita hamriik ba daudaun, Palásiu Prezidensiál konstrui ho asisténsia Xina nian,” tenik Nong Rong.
Alende ne’e, Xína husu Estadu Timor-Leste nia apoiu bá situasaun Xína ho Taiwan, tanba iha situasaun internasionál, Timor-Leste ho Xína servisu hamutuk bá interese komún.
Governante ne’e hein katak, ho lideransa Xefe Estadu,José Ramos-Horta ho Prezidente Xína, Xing Jimping nian ne’e, sei hatudu progressu di’ak iha futuru. (Smnews)
Komentariu