PR Horta No Xanana Muda Provizória Uma Kain 43 Ne’ebé Sofre Inséndiu Ba Bairo Pite

Smnewstl.com-Dili, 23 Fevereiru 2023 Prezidente Repúblika, José Ramos Horta no Lider Istóriku, Kay Rala Xanana Gusmão observa direta fatin inséndiu Kuarantena Tera Santa no vitima sira iha edifísiu Bombeiros Comoro, hodi deside muda provizóriamente vítima hamutuk uma kain 43 ba Coby House iha Palásiu Prezidensiál Bairo Pite nia kotuk, maibé família 7 seluk deside hela ho família iha Comoro no Tasi tolu.

Antes halo vizita vitima sira, Xefe Estadu José Ramos-Horta hamutuk ho Xanana Gusmão, inklui Xefe Kaza Sivil, Bendito dos Santos Freitas, Asessor Politiku, Tomas Cabral iha oras 7H00, organiza ekioa ho apoiu husi Komando F-FDTL, Bombeiros no empreza Pax hamos fatin, instala eletresidade hodi ajuda vítima sira ne’ebé mak atu hela provizóriu.

Vítima sira ne’ebé evakua husi Comoro mai fatin provizória, hetan mos asisténsia médika husi pessoal saúde sira, liu-liu ba inan isin rua no labarik.

Xefe Estadu husu vitima sira ba hela provizoriu iha fatin seguru ne’ebé ekipa prepara, hodi hein intervensaun governu.

“Ha’u ho Avó Nana vizita ona ba imi nia fatin haré ahi han motuk, imi bele muda fali lai ba fatin ne’ebé ekipa prepara provizoriu hodi asegura kondisaun ba inan no labarik sira,” dehan PR Horta ba vitima sira.

Hafoin konversa, Xefe Estadu no Xanana orienta kedas ekipa hodi tula vitima sira muda ba uma koby house no buka ajuda mós familia balun ne’ebé deside fila ba hela ho sira nia familia.

Entretantu, Xefe Aldeia Terra Santa Tasi Tolu, Esperança de Jesus hato’o agradese ba PR Ramos-Horta no Avo Nana bele vizita no haree rasik vitima sira nia kondisaun, inklui buka solusaun ba vitima sira.

Autoridade Lokál ne’e kontinua koordena ho Xefe Suku Madohi, Bernardio de Cristo Ferreira ho governu atu hamos hikas fatin ne’ebé ahi han mutuk iha tempu besik.