PR Horta Husu UEA Atu Investe Iha Hotelaria no Infraesturturas

Smnewstl.com – Prezidente Repúblika, José Ramos-Horta ho nia homólogu hosi Uniaun Emiradu Arábe (UEA), Liurai Sheik Mohamed bin Zayet Al Nahyan, explora área estratéjiku ne’ebé atu koopera iha futuru.

Tuir Xefe Estadu, Timor-Leste presiza kriasaun hotelaria fitun lima, hodi atende enkontru sira husi ASEA no mos Sentru Konvensaun hodi atende evento importante sira no ba finalidade ne’e presiza investimento.

Ba Prezidente Republika, UEA prontu atu investe ho modalidade tolu hanesan, UEA oferese de’it ou fó empresta osan ba Timor no ikus liu halo Invetimentu Públiku Privadu no mos aprezenta preferensi atu aposta ba energia renovável hodi miniza kustus ba eletrefikasaun atual.

Iniativa seluk ne’ebé UEA prende aposta mak kriasaun rezidensia ba universitária sira, hodi fasilita estudante sira hosi munisípiu mai eskola iha kapitál Dili, tanbá konsidera uma-aluga (Kós ) kuaze iha kondisaun mínimu no mos ba seitor agrikultura.

‘’UEA mos bele halo investimentu iha area pekuária liu-liu hakiak rusa hosi esporta inklui ko’alia kona-ba dezenvolvimentu iha area agrikultura,’’ tenik Prezidente Horta.
Kona-ba objetivu ne’e, Xefe Estadu admite katak, presiza prepara kuadru legal ba protesaun investimento, tributasaun no mos regularizasaun ba titularidade ba rai, hodi fasilita investimento ne’ebé permite kriasaun empregu no estimula ekonomia nasional.

Timor-Leste mos prosesa hela estabelesimentu embaixada foun iha Dubai (UEA) no exekutivu delega gela kompeténsia ba Ministru Negósiu Estranjeiru Timor-Leste hamutuk ho Prezidénsia Repúblika hodi formaliza estabelesimentu embaixada nian. (Smnews)