PR Horta Husu Emmanuel Macron Mobiliza Empreza Investe Hotelaria iha TL

Smnewstl.com – Xefe Estadu Timor-Leste hasoru malu ho nia Homólogu, Xefe Estadu Fransa, Emmanuel Macron, quarta ne’e iha Palásiu Élysée, sidade Paris.

Sorumutuk ne’e, nu’udár sorumutuk dahuluk nível Xefe Estadu Timor ne’ebé foin akontese iha istória entre rai-rua ne’e.

‘’Koalia kona-bá projetu tasi-mane no kona-bá portu foun iha Tibar ne’ebé halo hosi kompañia Franses (Boloré), no nia (Macron) kontente ho informasaun sira ne’e.

Ami koalia mos kona-bá Timor atu tama ASEAN inklui kona-bá Xina no diskute mos kona-bá problema Myanmar,’’ esplika Horta hafoin enkontru ho Prezidente Macron.

Durante enkontru, Prezidente Macron admira ho pozisaun Horta nian liga ho assuntu Myanmar ne’ebé oras ne’e hahu iha ona mudansa tambá líder sira iha Myanmar (pro-Demokrasia) husu Prezidente Horta bainhira ba Fransa atu koalia mos kona-bá Myanmar liu-liu husu apoiu ba Fransa atu tulun sira (Myanmar) iha rekursu humanu bainhira problema junta militár remata.

Além ida ne’e, Xefe Estadu rai-rua ne’e, komprometidu atu kontinua servisu hamutuk iha inisiativa ruma nível internasionál liu-liu liga ho preokupasaun Prezidente Horta nian kona-bá luta kontra extrema pobreza iha mundu liu-liu ba labarik no inan-feton sira.

Horta mos kontinua husu ba Prezidente Marcon atu mobiliza investedor ba Timor-Leste liu-liu iha area hotelaria ho nível fitun V nune’e, Macron responde kedas katak sei koalia ho empreza hotelaria sira iha tempu badak ne’e.

‘’Atu remata, ha’u husu atu loke embaixada ida iha Timor-Leste. Macron simu no tempu badak sei organiza ho Ministériu Negósiu Estranzeiru atu hare assuntu ne’e. Tamba ita, importante mak rai-bo’ot sira loke sira nia embaixada,’’ Tenik Horta.

Horta Subliña, mai Fransa la’ós konvite hosi Estadu Fransa, nune’e enkontru ho nia homógu Macron, hanoin atu halo de’it enkontru informál, maibé to’o iha Palásiu Prezidensiál Fransa, simu ho parada militár (guarda de Honra), tamba ne’e Xefe Estadu Horta apresia tebes.

Iha Fransa, Horta mos hato’o nia pozisaun kona-bá markasaun Fronteria terrestre ho Indonézia iha RAEOA ne’ebé oras ne’e iha hela polémika. Horta reforsa katak, konfia iha ekipa negosiadór ne’ebé xefia hosi atuál primeiru-ministru Xanana Gusmão.

Nia mos argumenta katak, assina akordu finál ba tratadu fronteira terrestre, seidauk realiza ho razaun sei iha hela diskusaun nune’e Horta solusita katak presija iha konsensu no akontese iha rai-barak katak konsensu ne’e iha parte ida lakon buat ruma no parte seluk mos sakrifika buat ruma. (*/SMnews)