PR Horta ho Eis Primeiru-Ministru, Tony Blair Koalia Koperasaun Bilateral

Smnewstl.com – Prezidente Republika, Jose Ramos-Horta iha Hotel Grand Hyatt Nova Iorke simu audensia husi Eis Primeiro Ministro Reino Unido, Tony Blair

Enkontru ne’e hala’o iha okaziaun partisipasaun Prezidente Repúblika iha Jestaun 78 Assembleia Jerál Nasaun Unidas (UNGA), iha kuadru vizita ofisiál prevista entre 17 to’o 24 fulan setembru 2023.

Durante enkontru, Prezidente Repúblika husu ba ‘Institutu Tony Blair’ atu estabelese kooperasaun parseria iha área reestruturasaun ba Presidénsia Repúblika, liu husi destakamentu husi peritus rua ka tolu ka espesialista sira husi Institutu ida ne’e iha Rai Unidu.

Institutu ne’e realiza kooperasaun hanesan ne’e ho gabinete Chefe Estadu no/ka Governu sira, ho projetu ativu iha nasaun tolo-nulu iha mundu tomak.

Liu husi apoiu iha reestruturasaun Gabinete Presidénsia, peritus sira bele fo apoiu iha formasaun rekursu umanu, espesifikamente iha preparasaun ba estrutura sira ne’ebé presiza ba prosesu adesaun ba Assosiasaun Nasoens Sudeste Asia (ASEAN) no Organizasaun Mundial Komérsiu (OMC).

Kooperasaun bele inklui prosedimentu internu no prátika internasionál ne’ebé di’ak, inklui uza teknolojia informasaun dijitál foun sira ba promosaun asaun transformadora no fasilita asesu ba informasaun ne’ebé iha baze kona-ba asuntu sira prinsipál no desafius globál sira, liu husi Sede Institutu ne’e iha Londres no rede global nia laran, liu-liu lian iha delegasaun rejionál iha Singapura ka delegasaun nasionál sira iha Indonézia no Filipina.

Iha ova Yorke, PR Horta ho Sekretariadu g7+ no Misaun Sierra Leone sei Organiza Simeira Alto Nivel iha loron Sesta 22 Setembro iha ambito Asembleia Jeral Nasoens Unidas ba dala 78.

Tema husi Simeria Altu Nivel g7+ ne’e rasik mak “Hasae solidariedade Global, sustenta paz no hari resiliensia iha nasaun afetado husi konflitu no frajilidade”. Simeira ne rasik sei lidera husi Presidente Republica Timor-Leste no mos Presidente República Sierra Leone

Delegasaun g7+ iha Nova Yorke nebe lidera husi Sekretariu Jeral, Dr. Helder da Costa, no akompanha husi Vise Sekretariu Jeral, Habib Mayar, Ofisial Media no Komunikasaun Helche Silvester, no Asistente Media ho Komunikasaun Flora Lopes.

Sr. Habib Mayar rasik iha ona Nova Yorke hanesan ekipa avansado nebe halao ona enkontru bilateral ho Misaun membru g7+ sira barak hanesan Burundi, Central African Republic, Costa do Marfim, Chad, Haiti, Guinea-Bissau, Liberia, South Sudan, Timor-Leste, Somalia, Sierra Leone, ho Yemen.

Enkontru mos ho parseiro hanesan Finlandia, Croatia ho agensia UN sira seluk. (Smnews)