PR Horta fo Apio Sosial ba Ema ho Difiensia Iha Bobonaro no Lolotoe

Smnewstl.com – Prezidénsia Repúblika, liu husi assesoria assuntu Inkluzaun Sosiál ne’ebé lidera husi assessór Prinsipál, Gaspar Afonso kontinua distribui apoiu sosiál hanesan fós, mina ba tein, kulsaun, pasta no kadernu ba estudante inklui parsél ida ba hahan nian, ba ema ho difisiénsia iha Munisípiu Bobonaro iha Postu-Administrativu Bobonaro no Postu-Administrativu Lolotoe.

‘’Ita distribui iha Munisípiu Bobonaro, iha Suku Teba-bui no Postu-Administrativu Lolotoe, mai apoiu ita nia maluk difisiénsia sira. Ida ne’e, halo sira sente dehan diskriminadu, ita lalori buat barak maibé ho vizita ne’e de’it mos sira sente orgullu tambá estadu ida ne’e la husik sira mesak’’ Dehan Assesór Afonso, hafoin distribui apoiu sosiál iha Lolotoe, Tersa ne’e.

Assesór ne’e, informa liu tan, bainhira nunka vizita sira (Ema ho difisiénsia iha area rurál), no la lori domin ba sira, ne’e sira sente diskriminadu iha sira nia moris no sente izoladu, tambá barak ne’ebé mai hosi família moris vulnerável tebes.

Hanesan ema ne’ebé mak reprezenta ema ho difisiénsia iha Palásiu Preidensiál, Gaspar Afonso haktuir, apoiu sosiál sira ne’ebé durante ne’e distribui, mai husi inisiativa Prezidente Repúblika, J. Ramos-Horta ho objetivu atu lakohi husik ema ida iha kotuk no fó domin ba sira mézmu apoiu ne’e atende de’it iha loron ida ka rua maibé importante mak prezensa iha sira nia le’et.

Husi atividade sosiál ne’e, atu fanun hikas ema hotu liu-liu governante sira atu hare situasaun ema ho difisiénsia iha territóriu nasionál no Xefe Estadu atuál mos fó prioriedade ba assuntu ema ho difisiénsia no direitu humanu, atu promove fraterninade humana, tenik Afonso.

Nia mos husu ba ministériu relevante sira ba assuntu ema ho difisiénsia liga ho dekretu Lei Nú. 8/2024 ne’ebé governu da-IX revoga, atu fó mos prioriedade ba ema ho difisiénsia husi idade 0-17 atu assesu mos ba pensaun seguransa sosiál.

Calisto Ximenes, reprezenta nu’udár mos matadalan ba rekolla dadus ema ho difisiénsia nian iha area rurál expressa ‘’Ha’u reprezenta maluk ema ho difisiénsia hato’o ami nia agradesimentu ba Prezidénsia Repúblika ne’ebé ajuda ona alin difisiénsia sira ne’ebé durante ne’e la hetan apoia sosiál ruma’’.

Entretantu, distribuisaun apoia sosiál ba ema difisiénsia sira iha Munisípiu Bobonaro ho totál benefisiáriu na’in 15 kompostu husi na’in 5 mai husi Suku Bugas, iha Postu-Administrativu Bobonaro no na’in 10 mai husi Suku Deudet, Postu-Administrativu Lolotoe.

Ema ho difisiénsia ne’ebé hetan benefisiária, maioria ema ho difisiénsia iha liman, ain, matan no mentál ho idade menus husi 17 hamutuk na’in 12 no idade 30-resin hamutuk na’in 3. (*/Smnews)